French striker Olivier Giroud chuan second half-ah AC Milan tan goal a khung a. 1-0 in Napoli lakah hnehna changin Serie A table chung berah an kirleh.
Diego Armando Maradona Stadium a inkhel team pahnihte an fimkhur a, goal chance a tam lo. A thlengtu lamin minute 90 chhungin Milan goal-ah vawi hnih chiah shot mumal an nei.
Second half \an hnu lawkah Giroud-a’n Davide Calabria ball cross chu a khung a, hei bak hi Milan in hlauhawm mumal tak an nei bik lo.
Napoli tan Adam Ounas leh Hirving Lozano ten inkhel tawp dawn lamah goal khung theihna hun an nei a, mahse goal zawnah ball a pet lo ve ve bawk.
Hnehna an chan avangin Milan hian Napoli hi point thumin an tlansan a, point hnihin Inter Milan chungah an awm bawk a, khelh khatin an khel tam thung.
Inkhel dangah a sang pali zinga tel ngei tum Juventus in 1-0 in Spezia an hneh a. Spanish striker Alvaro Morata chuan first half-ah goal awmchhun hi a khung.
Juve coach Massimilano Allegri chuan hnehna an chan danah a lung a awi thu a sawi a, “He team hian tum a nei a, hengte a tak rama kan chantir dawn chuan football mawi khel kher lova hnehna kan chan theih hi a pawimawh a, zaninah chutiang chuan kan ti a ni.” tiin a sawi.