White House Correspondents’ Dinner-a an awm laia silai hmeh puah a awm hnuah US President Donald Trump-a leh First Lady Melania Trump-i te chu venhim hna thawktuten hmun himah an hruai chhuak.
US Secret Service chuan Inrinni zan (India-a Pathianni tuk)-a ‘inkahna thlengah’ hian tumah hliam an awm lo tih an nemnghet a, mi pakhat man a ni tawh bawk.
White House atangin president chuan ‘hetiang thil a thlen hian a mak fo thin a, a danglam ngai lo’ tih a sawi.
He thil thlen hnu lawkah Trump-a chuan Truth Social-ah, “Mi kaptu hi man a ni tawh a, ‘THIL KALPUI ZEL’ turin kan rawt a; mahse, dan kengkawhtuten an kaihhruai ang,” tiin a ziak.
A dangah dan kengkawhtuten first lady nen an awmna hmun chhuahsan turin an ngen tih a tar lang bawk.
Kum tina tih thin White House Correspondents’ Dinner hi Washington Hilton hotel-ah neih a ni a, tlai lamah president hi thu sawi tur a ni a, hetih lai hian ballroom bulah silai a ri ta a ni.
US Secret Service agent-te chuan president leh first lady-te chu pindan atangin an hruai chhuak tih hmuh a ni a, Health Secretary Robert F Kennedy Jr leh Defense Secretary Pete Hegseth te bakah sorkar hotu pawimawh dangte pawh venhimna kalpui dan tur angin an him nan hma lak a ni bawk.
Inkhawma tel dangte chu ballroom chhungah hian dah chhunzawm an ni a, pindan chhunga awm ve chanchinbu mi tam tak chuan an hnathawhna theuh hmunah thil thleng hi puang hlawm.
White House Correspondents’ Dinner hi American press tradition a ni a, kum 1921 atanga tan a ni a, tunhma atang tawhin president hian a hmanpui thin.
Tun tum hi Trump-a’n president ni lai a nih anga tel lehna hmasa ber a ni a, a tel hnuhnun ber chu kum 2011 kha a ni.
Silai hmet puaktu nia sawi hi CBS-in a tar lan danin Cole Tomas Allen, kum 31, Torrance, California-a cheng a ni.
Trump-a chuan FBI leh Secret Service-te chuan California-a a chenna in dap phalna an nei tawh niin a sawi.
Washington DC-a police chief lailawk, Jeffery Carroll-a chuan he hun hmanna hmun khualbuka mikhual a nih thu a sawi a. Mi hlauhawm a ni ang tih rin chhan tur engmah a nei lo tih a sawi bawk.
Dan kengkawhtute chuan silai kah a nih thu an nemnghet laiin engzat nge kah tih erawh hriat a la ni lo va. Police chuan venhim hna thawktute leh a hmet puaktu hi an inkap tawn niin an sawi.
Carroll-a chuan a kaptu hi ‘shotgun, handgun leh chemte tam tak keng’ a nih thu a sawi.
Washington-a US attorney Jeanine Pirro-i chuan silai leh ralthuam hlauhawm hmanga sorkar laipui thuneitute beih thubuai pahnih a hmachhawn dawn thu thu a sawi.
Thawhtanni hian tih dan pangngai angin thubuai siamsak a ni dawn a. Silai a hmeh puah chhan hi hriat chian a la ni lo.
Thil thlen atanga darkar khat vel hnua White House atanga thu a sawinaah president chuan Washington Hilton hotel-a venhim hna thawktute ralthuam ‘chak tak’ hmanga a beih avangin mi pakhat man a nih thu a sawi.
Trump-a hian Secret Service agent pakhat chu hnai tak atanga kah a ni tih a sawi a; mahse, a bullet-proof vest-in a chhanchhuak a, amah pawh a hmu a, a tha tih a sawi.