Aizawl: ZPM Thalai chuan ropeway leh skywalk eiruk thubuai chu Mizoram Police-in zalen taka an chhui theih tak avangin MNF leh Congress party an thlaphang tan niin an sawi.
An thuchhuahah ZPM Thalai chuan tun hnaiah ropeway leh skywalk ei ruk thubuai chanchinin Mizoram pum a tuam chhuak hneh hle a, he thubuai hi a Lokayukta-a FIR/complaint thehluttu chu MNF party Vigilance Department leh an Legal Board-te niin MNF sorkar lai khan thubuai chhui hi mipuite beisei angin a chak lo hle a, ZPM an sorkar tak hnuah erawh police-ten chak zawka hma lain ACB chargesheet pawh Special Judge (Prevention of Corruption Act) Court, Aizawlah thehluh a ni ta tih an sawi.
Eiruk thubuai hi MNF leh MPCC-te chuan politics boruaka tham rala thubuai pawh zuzi chho tura an beisei mek laiin ACB chargesheet-a a lan danah contractor leh tourism department-a director hlui pakhat bakah MPCC party hotu lian pahnih, minister hlui John Rotluangliana leh MLA hlui Lalrindika Ralte bakah tuna MNF Thalai President, Hachhek bialtu MLA, Robert Romawia Royte lakah pawh thubuai thehluh a ni a, an chân loh khan leh beisei loh lamah MNF leh MPCC hotu lianten eiruk thubuai an awrh tak avangin eptu party lian pahnihte chu an mangang tan hle ni-a an hriat thu an sawi.