Aizawl: Save Chite Lui Coordination Committee leh PWD hotute chuan Larsap General Vijay Kumar Singh, Patron, Save Chite Lui Coordination Committee ni bawk chu Lok Bhavan, Aizawlah an kawm a. Save Chite Lui Action Plan Phase 2 (Lui cheibawl leh chei that) atana project kalpui mek chungchang an hrilh fiah.
Larsap chuan Chite Lui humhalh leh cheibawl kawngah theihtawp chhuaha tanrual a pawimawh takzet thu sawiin, Chite lui chu khawpui thli luan luhna ber a nih avangin checkgate/dam-te a khat tawka daha bawlhhlawh tangte thenfai zel a tul thu a sawi a. Lui kama awmze nei taka thingphun a tul thu sawiin, a chhehvela awm vengte, NGO leh department-te nen thawhhona mumal tak neih a pawimawh thu a sawi a. DRP tihhlawhtlin theih ngei tur leh hriat thiam awlsam siam tum turin a chah nghal.
Save Chite Lui Coordination Committee-te hian PWD leh Nodal Department, Environment, Forests & Climate Change Department-te nen tangkawpin Aizawl khawpui huamchhunga lui pawimawh tak Chite Lui cheibawl leh chei that hna project an kalpui mek a ni.
He hunah hian Save Chite Lui Coordination Committee leh PWD hotute chuan Save Chite Lui Action Plan Phase 2 chungchang PowerPoint Presentation hmangin an sawi fiah a ni.
An inkawmnaah hian Save Chite Lui Coordination Committee aiawhin Rochamliana, Gen Secretary, PWD atangin Er. Lalrinngheta, SE leh hotu dangte an tel a ni.