Khawbelin an khaw tlangval a tam thei ang ber chhawr tumin team an tidanglam a, season hmasa aiin Pro Volleyball League-ah hmasawn ngei an inring.
A vawi hnih nan Mizoram inelna sang berah Khawbel mipa team an tel dawn a, season liam ta khan kai thar ni chungin league round-ah an che tha a, player an inthlak hnuah thleng sang zo lovin semifinal-ah set la lovin champion ni zui ta Anastasia Electric Veng lakah an tlawm a ni.
Khawbel hian tun season tan a nih rualin team tha din tumin player an la lut a, coach atan Eric Lalsangliana Pautu ruaiin nikum September khan season hawnna tournament-ah final lutin Tuichangral an hneh lo a ni.
Hemi hnu hian mipuiin an khaw mi ngei player chhawr hnem turin club hruaitute an nawr a, team siksawiin May 11 atanga tan tur Pro Volleyball-ah an khaw player deuh vek an hmang dawn a, nikuma setter atana an hman David Lalramhmachhuana la kirin ani chiah hi Mizo player an ziah luh zingah an khaw tlangval ni lo a awm a ni.
Hetih lai hian season laihawlah an khaw player ni lo – Lalneihpuia, Ramnunfela, H Malsawmsanga leh setter Lalhmingmawia’n club an chhuahsan a, an khaw chhuanvawr leh tunlaia Mizo player tha ber pawl Johan Vanneihsanga hovin an khel dawn a, Pro Volleyball-a tawn hriat nei tawh Innocent Malsawmzuala leh Tommy Lalhlimpuia bakah Hrangbana College player Lalhunthara an kawl a, anni bakah player naupang zawk tan hun tha siamsak an tum a ni.
Club President C Lalsawmliana chuan, Khawbel team dik tak an ni leh zual dawn tih a sawi a, Johana that vanglai a ni a, Mizo player dang langsar awm lo mah se hliamin a tihbuai loh a, an inbuatsaih dan anga an khel chhuak thei a nih chuan nikum aia sang thlengin final an luh ngei a beisei a, khaw mipuiin an thlawp tha hle tih a sawi.
Khawbel hian Tuipuiral leh Hunthar player hlui Anurag Rawat an be fel tawh a, nikum ang bawkin state dang atangin team tichak thei player pahnih lak luh an tum a, pakhat lak luh tumin an la dawr mek.
Season liam ta khan Indian player tha Ashwal Rai an la lut fuh hle a, an khelh hmasak pahnihah chak zawnin a hnuah Tanish Choudhary an chhawr zui a, league-ah pahnihna ni mah se final lut pha lovin an tla a ni.