Aizawl: MZP chuan Thawhtanni hian Mizoram sorkarin tourism director charge la tura R. Lalrodingi a ruat duh lohna lantir nan tourism department-a thawkte pisa kai dang dawn.
MZP General Headquarters, Aizawl chuan Inrinni tlai khan an pisaah thutkhawm hmanhmawh kovin DP&AR (Civil Service Wing)-in Zirtawpnia Mizoram tourism director charge la tura pension tawh ruatna order a chhuah chungchang an ngaihtuah a, sut a nih hma chu na taka dodal zel an tum.
Sorkarin a ruatna thupek chhuah hi Mizoram mipui leh zirlaite zah lohnaah a ngai a, sut a nih hma chuan na takin an dodal zel dawn tih sawiin, “Hemi chungchang hmalakna kal zelah hian May 25, 2026 (Thawhtanni) hian Mizoram tourism pisa kai tur dan a rel a ni,” tiin Inrinni tlai khan thu an chhuah.
MZP hian an hmalakna turah hian mipuite thlawpna a ngen a. Pisa kai tur dannaah hian thalai hna zawng mek leh zirlaite tawiawmna turin an ngen nghal.
Inrinni veka MZP-in Aizawl Press Club-a thuthar lakhawmtute an kawmnaah an president, Dr. Lalremruata chuan tun hnaia tourism director-a pension tawh mi pakhat dah a ni leh chu sut leh ngei nise an duh tih a lo sawi tawh bawk a. May 13, 2026 khan chief minister hovin sawiho a ni a, tourism director-ah pension tawh dah a ni chu an duh loh thu sawiin chief minister pawhin an ngaihtuah nawn dawn thu a sawi a. MZP duh dan anga sorkar a kal dawn emaw tih laia duhsak bik neia thil an ti chu MZP chuan pawi a ti hle tih a sawi.