Tourism department a director dah danah duh lohna lantirin zirlaite an pungkhawm a, niminah Tourism department pisa kai turin dangin, thu lawmawm an hmuh loh avangin vawiin lamah dan chhunzawm an tum leh bawk.
Zirlai pawlte hian hun hmasa lam atangin eng party pawh sorkar se pension rawih nawn hi an dodal tawh thin a, thalai lehkhathiam leh fit zawkte dah luh zel chu an duh dan a ni fo thin.
Tuna Tourism department-a hetiang thil a thleng leh ta pawh hi a pawi a, chuta karah an lungawi loh zualna turin chief minister berin dawt a hrilh nia sawiin, a lehkha ziahna copy thlengin a darh a, a lungawithlak loh hle a ni.
Chief minister hi ram khat hotu lu ber, mipuiten pa chan chang tura kan ngaih, lungawi lo leh thiam taka an lungawi theihna tura thlem tur a nih laia kan zirlaite a lehkhaziahsak ngei ngei amah vekin a bawhchhe leh nia lang hi a pawi a, rin ngam a ni zui lo mai ang tih hlauhawm tak a ni.
Tuna pension rawih nawn chungchangah pawh hian ngun taka thlir a, chhiar a, chik deuh chuan sorkar hian duhsakna uchuak deuh a nei emaw ni chu aw a tih theih a, kan zirlai pawlte lungawi lohna pawh hi a awm hliah hliah zawk a ni.
Sorkar hian pa chan chang ngam se la, chief minister pawh hian a chawhma thu leh chawhnu thu hi danglam fo lo turin din tlang pui ngam thin se buaina hi chu a reh maiin a rinawm e.