Aizawl: Sports Minister Lalnghinglova Hmar chuan contact sport-te hmasawn nan ITI-ah Centre of Excellence of Boxing din tum a ni, hemi atan hian Rs vbc 38.39 sanction a ni tawh tih a sawi.
Thawhlehni khan MSSC Conference Hall, Hawla Indoor Stadium, Aizawlah tun hnaia National Championship-a Mizoram tana lawmman latute lawmpuina hun a hmanpuinaah sports minister chuan, Mizoram tihmingthatute chu a lawmpui thu sawiin infiammite chu an hma zawn theuhah a tha ber thleng thei tura rilru leh taksa buatsaih turin a fuih a. Mizoram sorkarin infiammite hmasawnna tura ruahmanna a siam mek zel thu sawiin hnam chawimawitu infiammite hnenah lawmthu a hrilh bawk.
Lalnghinglova Hmar chuan contact sports-te hmasawn nan Centre of Excellence of Boxing chu ITI, Aizawlah din tum a nih thu a sawi a. He hna thawhna tur hian Ministry of DoNER atangin Rs vbc 38.39 lai mai fiahna (administrative approval & financial sanction) hmuh a nih tawh thu sawiin, hei hian infiammite tan hmasawnna nasa tak a thlen a beisei thu a sawi.
Tun hnaia 4th PAFI National Arm Wrestling Championship 2026, May 29-June 2 thleng Gujarat, Gandhinagar-a neihah Mizoramin gold medal 14, silver medal 13 leh bronze medal pariat, a vaiin Medal 35 an la a. 7th Youth National Muaythai Championship 2026, tun thla ni 1 atanga 4 chhunga Uttarakhand-a Haldwani-a neihah Mizoramin gold medal pakua, silver medal pariat leh bronze medal pathum, a vaiin medal 20 an la bawk.