Aizawl: June 11, 2026 khan Mizoram pumah Green Mizoram Day vawi 28-na hman a ni.
Green Mizoram Day hi Aizawlah chuan Environment Forest & Climate Change Minister Lalthansanga hovin Youth Recreation Centre, Falkland-ah hman a ni a. Minister chuan dept leh pawl hrang hrangten thing an phunin mi dang tana hnawksak lo tura enkawl tur te, a phun leh humhalh kawngah a tul anga sorkar thawhpui zel turin a chah.
Mizoram hmun zaa 86 chu ram ngaw a la nih thu te, thing phun enkawl that chuan ram ei leh bar dinhmun a tha zawga a nghawng thu te tar langin, uar zawka thingphun leh enkawl chhunzawm tura inhrilhhriat nasat lehzual nasat a tul thu a sawi bawk.
Kumin Green Mizoram Day thupui hi ‘Thing hi rangkachak anga hlu, nunna tinreng bul a ni’ tih a ni.
Green Mizoram Day hi a tirah ‘Green Aizawl’ tiin kum 1998 khan Aizawlah hman tan niin kum 1999 atangin ‘Green Mizoram’ tiin ram pumah thing phun ni atan hman a ni.
Lungleiah chuan Lunglei District Level Committee on Greeen Mizoram buatsaihin hman a ni a. |haizawl Community Hall-ah Sub-Divisional Officer (Sadar) TT Beikhaizi hovin a hawnna hun hman a ni a. Lunglei leh |haizawl inkar national highway dunga department leh pawl hrang hrangten kum 2024-a an thing phun tawhte tifaiin a thi thlakna a tiak thar an phun belh bakah a hungna an siam tha nghal bawk.
Lawngtlaiah chuan Deputy Commissioner office tualzawlah inkhawm tawi leh Lawngtlai leh Kawlchaw inkarah thing phuna a ni.
Champhaiah chuan District Bawrhsap Mohammad Aaquib hovin hman a ni a. Zote tiau kawng dung sir tluanin thing phun a ni a, sorkar department hrang hrang bakah NGO-te chu thing phunna tur hmun siamsak theuh an ni a, anmahni chanpual theuhah thing an phun a ni.
Siaha-ah MADC Forest Hall-ah hman a ni a. Mizoram sorkar leh MADC-a department hrang hrangte chuan Siaha khaw daia hmun hniha inthenin thing an phun.
Serchhipah a hawnna Serchhip DC Pisapui Hall-ah hman niin C. Lalhminghlua, Honorary Wildlife Warden kaihhruaiin Green Mizoram Day, 2026 thutiam sawi rual niin hawnna hun hman a nih hnu hian Kikawn leh Keitum inkar kawngpui kamah thing tiak phun a ni.
Mamitah LAD Park hman a ni a. Solai Azyu, Member Secretary/DFO, Mamit chuan kaihruaiin kum hmasaa thing phun tawhte sam nan leh a nung lo thlak nan hun hman niin a tiak 150 vel phun belh a ni bawk.
Khawzawlah hawnna inkhawm DC Conference Hall, Khawzawlah neih a nih hnuah NH-6 Tuisen phai leh Tuichang inkar kawng sirah thing 546 an phun a ni.
Hnahthialah Hnahthial By Pass Road kawng sir hmun hrang hrangah thing phuna hnatlan a ni a. Sorkar pisa hrang hrang leh NGO ten thing tiak 285 an phun.
Saitual-ah pawh inkhawm tawi Keifang Venghlun YMA Zawlbukah neih a nih hnuin, zirna in hrang hrang ten an remchan dan angin thingphun hnatlang an nei a, Sub Hqrs YMA pawhin an hmun neih Sub Hqrs YMA Rosangi Memorial Park ah thingphun hnatlang an nei a, kum kalta lama kawng dunga thingphun hmunhma tihfai tura mawhphurhna nei ten hun an hmang bawk.