Tunisia chuan World Cup 2026-a an inkhelh hmasak bera an chak loh hnuah head coach Sabri Lamouchi an bân zui nghal.
Pathianni (India-a Thawhtanni tuk) khan Mexico-a Guadalupe khawpuia Estadio Monterrey-ah Group F inkhelah Sweden-in Tunisia lakah 5-1-in hnehna an chang.
Hemi hnu hian Lamouchi hi bân nghal a nih thu sawi a awm a; mahse, kum 54 mi hi Thawhtanni pawh khan training-naah a la awm nia sawi a ni bawk.
Tunah erawh chuan a chiang tawh a, Tunisian Football Association chuan French contract hi ‘inhriat thiam tawnna nen’ tihtawp a nih thu an nemnghet tawh tawh a ni.
Morocco leh Saudi Arabia manager hlui, Herve Renard chu inelna tawp thleng head coach atan ruat a ni nghal bawk.
Lamouchi hi World Cup chanchina manager zingah inkhel khat chiah enkawl hmana bân hmasa ber a ni ta a ni.
Tunisia hian 1998 World Cup-ah pawh khan bul an tan that loh avangin manager Henryk Kasperczak chu an lo bân tawh a, hemi tum hian an inkhelh hmasak pahnihah hnehna an chang zo lo.
France-a inelna khelh a nih tum tho hian Cha Bum-kun chu South Korea-in an inkhel hmasa pahniha an chak loh hnuah an lo bân ve tawh bawk a, Julen Lopetegui chu Real Madrid manager nih a remtih hnuah 2018 World Cup tan hma ni hnih velah Spain-in an bân tawh bawk.
Tun tuma thil thleng erawh World Cup-a vawi khat chiah a team khelhpui hmana manager-in a hna a chân hmasak ber a ni a, Lamouchi-a hian thla nga chhung Tunisia a enkawl chu a tawp ta a ni.
Nottingham Forest boss hlui hi January thla khan lak luh chauh a ni a, Africa Cup of Nations-a last 16-a Mali an hneh loh hnua a hna kalsantu, Sami Trabelsi a thlak.
Sweden an hneh loh hnua thu a sawinaah Lamouchi-a chuan an chak lohna chu a hrehawm hle tih a sawi a. “Hetianga chak lohna chhe tak hmanga inelna tan hi a harsa tak zet a ni,” a ti.
“Kan tihsual a tam lutuk a, khatiang kha kan tih tur a ni lo. Keimahni leh keimahni kan inhliam a ni,” a ti.
Lamouchi-a hian Tunisia head coach a nih chhungin vawi nga a khelhpuiah vawi khat chiah hnehna a chang – a khelhpui hmasak berah Haiti lakah 1-0-in hnehna a chanpui a ni.
Tun thla tir lama World Cup atana warm-up match hnih an khelhah Austria lakah 1-0-in an tlawm a, Belgium lakah 5-0-in an tlawm zui bawk.
Tunisia hian Group F-ah Japan leh Netherlands an hmachhawn leh ang.