Aizawl: Disaster Management & Rehabilitation Department chuan tun hnaia ruah sur nasa leh fur intan chho mekah Aizawl district hmun hrang hrangah chhiatna thleng thei laka him nan hriattirna a tichhuak.
Lei min, lung tla, retaining wall chim leh chhiatna thleng dangte a awm avangin Aizawl district mipuite chu fimkhur tur leh him nan veng/khaw tina Village/Local Level Disaster Management Committee pawh mahni veng/khua theuha a tul anga hma la turin an ngen.
DM&R-in ngenna a tihchhuahah lei min hlauhawmte ruah tlak laia a tul anga khuh hul tur te, in tinin tui luan kawr/tui chhe paihna mumal taka siamin tihfai tur te, septic tank/soak pit leak awm leh awm loh enfiahin, a lo awm a nih chuan a rang lama thawm tha turin an ngen.
Thing leh mau, thli leh ruah in a tih tluk mai theih, chenna in leh electric wire delh mai theihte chu a ram neituten forest department berawnin kih/zar thlak tur te, ruah sur nasat laia tui hmun leh kawr hnaiah kal lo tur te, lei min/lung tlak theihna zawna kawng hmangtu lirthei leh kea kalte fimkhur turin an chah.
Sorkarin ‘hmun him lo’ a tih, kal tlang phal loh hmunah tumah kal tlang lo tu te, lung rem chim hlauhawm leh tui dawng tam zawna awmte leh a thlang kawng hmangtute fimkhur tur leh mi mal ram chhunga lei min veng thei tur chi hnimte sam fai lo tur leh lei min ven nan mi mal ram awlah thing, a zung lei tinghet thei chi phun uar turin mipui an ngen.