Aizawl: Power & Electricity Minister u F. Rodingliana hova department engineer-te thukhawm chuan Aizawl khawpuia power supply tihchangtlunna tur ngaihtuahin Inrinni-a shutdown thin pawh tihtlem an rel.
Zirtawpni khan minister ho hian department thuneituten Aizawla power supply khaihlak thin chhan leh siam that dan tur an sawiho va, a bik takin chhan hrang hrang avanga Inrinni-a shutdown thin chu tihtawp dan tur ngaihtuah a ni.
Thutkhawmah hian Aizawl chu 33 kV ring line hmanga veh chhuah vek a nih theih nan hmalak an rel a, hemi atan chuan pawisa awm angte pawt khawma bul tan nghal an rel.
Chawnpui, Durtlang North leh MINECO area-a power pekna buai fo thin tihreh nan Chawnpui Sub-Station thuam that dan tur sawiho a ni a, a tul anga bawh zui nghal a ni ang.
Ruah sur laia isolator chhia siam that mai theih loh avanga rei tak current awm lo thin pumpelh nan circuit breaker siam that veka isolator pawh a tul anga indoor-a daha control room atanga hnathawh dawna shutdown pawh him taka tih theih tura ruahman a ni a. 11 kV line-in a chawm thui lutukte tihtawi nan Aizawl hmun remchang laiah sub-station siam belh a, 11kV line then tet tura ruahmanna siam a ni bawk.
Heng bakah ABC line earthing tha lo a tam avanga line chhia awm thinte tihreh nan siam that an rel.
Aerial Bunch Cable (ABC) aiah a tahtawla cover conductor hmang tura hmalak ni se tih a ni.
Thutkhawmah hian Teirei Hydel Project leh Tlungvel Solar Plant te department-in changtlung zawka a enkawl dan tur te ruahman a ni a. Tuivai Hydel Project tihhlawhtlin nan hnathawh turte phase thuma then darha a tahtawla hmalak dan tur rel a ni.
Meeting-ah hian K Lalrinzuali, Commissioner & Secretary, Power & Electricity Department; Er. Ngursailova Sailo leh chief engineer te an tel.