Aizawl: MSU General Headquarters-in Ningania Mizo Under Graduate Topper mi 24-te lawmpuina hun, Zonuam-a Woodland Hills Auditorium-ah an hmang a. Minister C Lalsawivunga chu khuallian niin Mizoram Rural Bank Senior Manager (FI) V Lalrinmawia chu khualzahawm a ni.
Khuallian chuan zirlai chawimawite chu an taimakna, tumruhna leh tih tak takna an neih avanga hlawhtling an ni tih thu sawiin an hma hunah chhawrtlak ni turin theihtawp chhuah lehzel turin a fuih.
Minister chuan Mizo thalaite chu All India Sevice-ah lut an tam tawk lo chu pawi a tih thu sawiin, thalai tam zawk chuan UPSC leh SSC exam-te ngaihven thara heng exam-ah an tlin ngei theih nan theihtawp chhuah zel turin a fuih bawk.
Khualzahawm chuan MSU-in zirlai hlawhtling te lawmpuina hun an buatsaih chu lawmawm a tih thu sawiin Mizo thalaite chu a tam thei ang ber banking service-ah lut turin a sawm bawk.
MSU President B.Lalkhawngaihzuala chuan gold medalist panga zingah Mizo pali lawmpui tur an awm chu lawmawm a tih thu sawiin, zirlaite chu ram leh hnam hmangaiha aia upate zah thiam tur leh an thiamna hmanga Zo nun ze mawi chawi nung zel turin a chah a ni.
He hun hi MSU Vice President Roluahpuia’n a kaihruai a. General Secretary Zodinsanga’n report a pe a. Zirlai lawmpuite hi Mizo subject topper 24 leh SU leader pahnih pawisa fai leh citation hlan an ni.