- Dr. C. Lalrampana
Zungawlvei pa pakhatin a chhungte hnenah-”Ka zu in ringawt in sawi a, ka bawnghnute in in sawi ve ngai si lo” a ti a, a dik hmel hle.
Social media platform hrang hrangah ziaktu chihrang hrang kan awm. Keimahni mimal thiamna ringawtin a daih lo, Google, AI, midang kamchhuak, mithiamte lehkhabu ziah, mahni theuha kan tawn hriat leh midang tawn hriat leh thiamna hmanraw chihrang hrang atanga fawmkhawm hmanga ziakin kan pho chhuak thin. Chutiang chu kei pawh ka inbuatsaih dan a ni tlangpui thin.
Hetih lai hian Social Media platform hrang hrangah la thuziak ve thin chungchangah mi hmusit tak taka tawngkam feikibara mi khawh pawp pawp duh leh ka ziah ve a nih avanga mi deusawh tak tak, mi ngai thei lo hrim hrim tam tak ka tawng thin. Mithiam dang ziahte pawh hi han belhchian chuan anmahni irawm chhuak thiamna ngau ngau a awm bik chuang si lo. Engatinge kei hi min ngai theih loh riau bik le? A ziaktu mihring nihna leh hmel, pumrua leh dinhmun azirin thil ho deuh pawh ziak se an sawisel ve ngai loh? Zungawivei pa tih ang deuh khian ngatinge keima ziah hi an hmuhmawh bik tlat thin le tiin ka dawn vawng vawng thin.
Mihringte hian mihring hmasaber atangin thiamna, finna, hriatna leh theihnate kan inhlanchhawng zel a. Tumah hi famkim saa piang Pathian ang an awm lo. Chuvangin, chhungkua, zirna sikul leh khawtlang leh ram kan neih a ngai thin a ni.
Mihring zawng zawng hi thiamna [talent/gift] nei vek kan ni, mahse, a inang vek lo. Mi pakhatin a thiam chu mi dangin a thiam ve kher lova, mi dangin a thiam chu mi pakhatin a thiam ve lo thei bawk. Hei hi mihringte a huhova awm khawm tura Pathianin min siam dan pawh a ni.
Entirna nan: Zirtirtu chuan zirlaite a hrilhfiah thiam a ngai thin. Doctor : damdawi leh enkawlna lamah a thiam a, chutiang thiamna chu a nei.
Musician: zai & hla sak leh hla phuah a thiam.
Carpenter: thing remkhawma thil siam leh in sak a thiam.
Farmer: lo enkawl leh thlai chin a thiam.
Leader: mi hruai leh ruahmanna siam thiam.
Mi thenkhat, mi dang ngaihsak, ngaihdam leh fuih thiam an ni. Thiamna chu a lo lang nghal vek lo. Zirna, hna thawh, leh hman chhuah zelna hmangin a lo puitling a ni fo.
Kristian ngaihdanah phei chuan, Korin 12:4–7 chuan “Thlarau Thianghlimin mi tinte hnenah thilpek (spiritual gifts) hrang hrang a pe a, chu chu kohhran leh mi dangte ṭangkai tura hman tur” a nih thu a sawi.
Mihring zawng zawng hi thiamna nei vek kan ni, mahse, thiamna hrang hrang neiin, chu chu zir leh hman chhuah a ngai a ni. A tam zawk chuan lekhabu atang chauh ni lovin, hriatna leh thiamna an inhlanchhawng ṭhin.
Thil hi tihian a danglam a ni: Lekhabu atangin hriatna [knowledge] kan zir. Zirtirtu [teacher/mentor] atangin dan leh hman dân kan zir. Experience [tih chhinna] hmangin an thiamna kan tipuitling thin.
Entirna: Doctor chuan medical book a zir hmasa, mahse, damdawi a enkawl tak tak hma chuan a thiamna a puitling mai lo; hospital-ah practice a nei a, doctor senior-te hnen atang pawhin a zir. Musician chuan music theory leh notation a zir thei, mahse, zai & hla sak leh instrument tum thiam tak chu practice tam tak hmangin a lo thiam. Carpenter chuan thinga thil siam dân a zir thei, mahse, kut hnathawh chu tih chhinna hmangin a lo puitling.
Chuvangin, lehkhabu chuan hriatna a pe, mahse, thiamna tak tak chu zirna, zirtirtu hnen atanga hriatna a dawn leh a taka tih [practice] hmangin a lo puitling a ni. Hriatzauna [Knowledge] chu zir chhuah theih a ni; skill (thiamna) chu zirna leh hman chhuah zelna hmangin a lo puitling a ni.
Hetiang hi mihringte nihna leh dinhmun mek a ni. Keipawh PS-University level thleng ka zir ve a, a taka thil chihrang hrang tawnhriat chawp pawh ka ngah. Hmabak erawh thlan khur luh hma zawngin ka la nei teuh. Keimah ang vek hi ka mihringpuite kal mek dan pawh a ni. Mizo ze tha lo leh tenawm tak chu tupaw’n thu ziakin sawi se, an tum tak [subject matter] hre duh si lo, an mizia leh dinhmun leh pianphung leh hmel atanga teha diriam kan chin thinna hi a ni. Keimah anga beih tawk ve pawh hi an awm nual tih ka hria a, ka khawngaih thin hle.
Mahse, Pathian atanga talent/gift ka neih hi ka zahpui lova midang nunah ka buai hek lo. Ka dinhmuna ding ve leh ka tawn ang tawng ve mekte pawh kha zam mai suh u. Thihna paltlang vek tur, thi thei, dam lo thei leh khawvel thuhmun chen vek kan ni. Mi hmuhsit ching leh intiveiho hi an nun a hahdam lo tih kan hriat a ngai. Chuvangin, tan la sauh sauha theihtawp chhuah zel zawk tur kan ni e.