Chief Minister Lalduhoma kaihhruaina hnuaia Mizoram State Core Committee on Fight Against Drugs thukhawm chuan ram chhunga heroin a tlem a, a man a to tak hnuah ganja leh khuh damdawi (vough syrup) hman sual a hluar thar hle tih an tar lang.
Thawhlehnia CM Conference Hall-a thutkhawmah hian ganja hi hmeichhe naupangte thlengin an hmang sual hle nia tar lan a ni a. Naupang leh zirlaite hnena ruihhlo laka fihlim tura zirtirna pe turin School Education Department leh kohhran hrang hrangte hmanga mission mumal tak kalpui a tul hle nia ngaih a ni.
Heng ruihhlo hluar thar mekte dan hmanga khuahkhirhna Mizoram state mil tur duangtu tur committee din nghal a ni a. Hei bakah hian court-a thuhretute kal man leh senso pek thin chu awlsam zawka kalpui a nih theih nan IFMIS system paltlang kher lo tura tih a ni bawk.
Thutkhawmah hian veng leh khaw tina ruihhlo dotu pawl nung leh chak zawk din dan ngaihtuah an remti a, ruihhlo do beihpui hmang zela tan lak chhunzawm tlan zel a nih tur thu an sawi bawk.
Chief Minister Lalduhoma chuan ruihhlo dona kawnga hmalatu department hrang hrang leh tlawmngai pawlte chungah lawmthu sawiin, ruihhlo do rem vek rih lo mah se, an hmalakna hian rah tha a chhuah tih hmuh theih a nih thu a sawi.
Excise & Narcotics Department chuan Operation Jericho kalpui a nih hnuah ruihhlo tawlh ruk a tlem a, ruihhlo leh khuh damdawi man pawh a to chho hle tih report an pe a. Police Department pawhin kum 2025 khan ruihhlo case 319 ziak lutin mi 483 an man a, kumin June thleng khan case 219 ziak lutin mi 312 an man tawh thu leh ruihhlo tawlh ruk dan a te tham tak avanga man zat hi pung ta nia an hriat thu an tar lang bawk.
Social Welfare Department report atanga a lan danin Hulhhliap Short Stay Centre-a lut za zela 30 ten ruihhlo an sim hlen a, helai hmun enkawltu sorkar hian mi pakhat zelah Rs 15,422 seng zelin helaia kal mi 198-te hnenah skill training chi hrang hrang an pe a, an zinga mi 21-te hnenah ‘Bana Kaih CM Special Package’ an sem bawk.
Central YMA pawhin Anti-Drugs Squad leh Operation Jericho hmanga an hmalakna hrang hrang report pein sorkar puihna hmangin TBCC-ah ruihhlo ngaite enkawlna hmunpui an sa belh mek tih an tar lang bawk.
Thutkhawmah hian Home Minister K. Sapdanga leh Excise Minister Lalnghinglova Hmar an tel.