Aizawl: Mizoram Pradesh Congress Committee (MPCC) chuan BJP kaihhruai Central sorkarin parliament-a Foreign Contribution (Regulation) Amendment Bill, 2026 a chhawpchhuak chu Kristiante leh NGO-te tana hmanrua hlauhawm tak a ni tiin, a rang lam a dodalna leh hmalakna nei turin Ningani khan Mizoram Chief Minister Lalduhoma hnenah ngenna memorandum an theh lut.
Chief minister hnena memorandum an theh luh zawhah MPCC hruaitute chuan Aizawl Press Club-ah thu thar thehdarhtute an kawm a. Congress party chuan ram, hnam leh sakhua humhim chu an din chhan leh an ngaih pawimawh ber a nih thu an sawi a. FCRA chu BJP leh a thurualpuiten thuneihna an chan hnuah nasa taka tihdanglam a nih avangin Kristian pawl hrang hrang leh NGO-ten ram pawn atanga tanpuina an hmuh thinna kawngah harsatna lian tak a thlen tawh thu leh, Mizorama kohhran leh NGO-te pawhin hei hi an tuar mek a ni, an ti.
MPCC chuan July 21, 2026 khan Vana pa Hall kawtah FCRA Bill 2026 dodalna hun (Black Day) lo hmang tawhin, Ningani khan chief minister hnenah hma lak pui tura ngenna an thehluh leh a. Ngenna an theh luhah hian FCRA Bill hi Kristian-te leh NGO tan a that loh em avangin hnuk let tura nasa taka nawr turin chief minister kaihhruainain kohhran hruaitute, NGO hruaitute leh political party tin hruaituten prime minister hmu rawh se tihte, FCRA Bill, 2026 hi Parliament-a putluh a nih hunah Mizoram MP ten a thatlohna leh dodalna thu sawi ngei se, vote thlak hunah pawh ‘hai’ mai lovin, a dodal zawng ngeiin vote thlak ngei rawh se tih leh FCRA Bill, 2026 dodalna resolution chu Mizoram Legislative Assembly-ah pass a nih ngei theih nan Mizoram sorkarin Special Assembly Session ko rawh se tihte an tar lang a ni.
MPCC chuan ram leh sakhua humhim kawngah mipuite leh political party-te lungrual taka tanrual a ngai ta hle tiin, Mizoram sorkar leh Kohhrante’n tawngtai rualna hial an lo neih tawh hnua sorkar ber a la ngawih tlat chu mak an tih thu leh, “NDA sorkar hi kan lo hlau ta viau em ni?” tih chu an zawhna a nih thu an sawi.