August atangin Mizoram pawn atangin balu lak luh an remti tawh dawn lo tiin Mizoram Tipper Association Joint Committee chuan Thawhtanni khan Aizawl Press Club-ah thuthar thehdarhtute an kawmnaah an sawi.
Mizoram Tipper Association (Drivers’ & Owners’), All Mizoram Commercial Tipper Association Owners & Drivers leh Mizoram Tipper Association Kolasib District-te intelkhawm joint committee chuan tun thla ni 15 khan Dohlai leh Lailapur-a balu la an pawl member mi palite chu Assam forest-in an man tih an sawi.
Heng mite hian balu neitute nen inbe fel veka phur an nih chungin hren an ni a, chawlhkar khat hnu, July 22 zan khan Rs 13,000 chawitirin an chhuah leh tih an sawi a. Man an nih lai hian Assam mi balu phur pawh awm ve reng mah se man tel an ni lo va, an man chhan leh sum chawitir nana royalty pawh balu neitu chawi tur zawk a nih avangin mantute pawhin a chhan tak an sawi fiah thei lo tiin an sawi.
Joint committee hruaitute chuan kum eng emaw zat liam ta atang khan Assam-a balu phurh chungchangah Mizote tan hnam anga inenhranna leh harsatna an tawk thin tih an sawi a. Hei hi balu phurtute tan a him loh bakah Mizoram mamawh khawp balu chu Mizoram chhungah lak tur a awm ve tho avangin state pawn atanga balu lak luh hi an tum tawh loh thu an sawi.
Tunah hian Bagha, Bairabi leh Langkaih tlangdung atangin balu hi Mizoramah a lo lut thin a. Heng state pawn atanga balu lo lutte chu dan hmangin Aizawl leh Kolasib-ah dan an tum dawn a, dan hmanga hmalakna a hlawhtling lo a nih chuan mihring tha hmanga hmalak a ni dawn tih an sawi bawk.
Hei bakah hian Joint Committee chuan Mizo zingah hnam dangte hnena hming hawh tira lirthei registration tih tir thin an awm chu tha an tih loh thu an sawi bawk.