Aizawl: Mizoram Youth Commission (MYC) Chairman Malsawmzuala Ralte chuan Union Ports, Shipping & Waterways Minister Sarbananda Sonowal chu Delhi-a a chenna inah hmuin, Mizo thalaite tana tuipui leh lawng lama hna thawhna kawng hawnsak turin a ngen.
MYC chairman hian Ministry-in nikuma hmarchhak thalai 50,000-te tuipui leh lawng (maritime) lama hnathawk thei tura training pek a tum thu a lo puan tawh chu, Mizo thalaiten an chhawr ve theih nana training centre Mizorama hawng ve turin a ngen.
Union minister chuan he training centre hi Dibrugarh, Assam-ah din tura ruahman mek a nih thu a lo sawi a. Mizoram atanga training duh te hming lo lakhawm tura chahin, chumi a zirin Mizorama training centre din dan tur pawh la ruahman theih a nih thu a hrilh bawk.