Aizawl: Mizoram Pradesh Congress Committee (MPCC) bultumin Inrinni khan Lal Thanhawla Auditorium, Congress Bhawan-ah India ram pum huap campaign ‘Zirlaite Au Aw’ (Chhatroon Ki Goonj – Students Voice) hun an hmang.
He hunah hian Mizoram leh India ram zirna kalphung siamtha tura zirlaiten hlauhna paiha huaisen taka au chhuah a ngai a ni tih tar lan a ni.
Hun hmanpuitu MPCC Senior Vice President Lalnunmawia Chuaungo chuan zirna hi thalaite mahni kea din tirna leh ram tana chher chhuahna bulpui ber a nih avangin zirna kalphung siamthat a ngai takzet tih a sawi a. Central-a sorkar mekin zirna danglamna thlentir a tumna chu education tha zawk siam a hnekin sakhua bik chawi vul tumna zawk a ni tih a sawi a. Congress party-in thalaite policy atan ‘Mizoram Youth Manifesto 2028’ leh rawtna thlenna tur platform lian tak an siam dawn thu a sawi bawk.
Resource Person Prof. Dr. Zodinliana Pachuau (MZU) pawhin thusawiin, he movement hi Rahul Gandhi hova AICC, Youth Congress leh NSUI te’n June 17, 2026-a Kota, Rajasthan atanga an tan a nih thu a sawi a. NEET paper leak, exam cancel thut thut, recruitment tlai leh zirna kalphung privatise leh centralise nasa lutuk avanga zirlaiten harsatna an tawh mekte chhanchhuahna tur campaign a nih thu sawiin, Mizoramah pawh sorkar hnalak leh MPSC exam result fel lo avangin zirlai tam tak an rilru a hliam a ni, a ti.
‘Zirlaite Au Aw’ hun hi Ngurdingpuia Pachuau, President, MPYCC & Chairman Chhatroon Ki Goonj Committee-in a kaihhruai a. Aizawl khawpui chhunga college leh university zirlai eng emaw zatte nen Mizoram chhunga sorkar hna lak mumal loh chungchang leh exam cancel/result fel loh avanga zirlaiten harsatna an tawhte langtlang takin an sawi ho nghal a ni.