Aizawl: Mizoram Assembly House Conference Hall-ah NITI Aayog buatsaih hmarchhak bial tana Regional Workshop – Strengthening SITs to drive Viksit North Eastern Region hawn a ni a, Chief Minister Lalduhoma chuan a hawnna inkhawmah thu sawiin, kum 2047-a India GDP-a Mizoram-in zaa pakhat a thawhchhuah ve theih nan leh ‘Raltiang Ram’ hmathlir document tihlawhtling tura ke pen a ngai a ni tiin a sawi.
Chief minister chuan NITI Aayog-in State Support Mission (SSM) hmanga Mizorama hma an lakpui a tangkaipui thu leh, Mizoram State Institution for Transformation (SIT) tichak a, sorkar laipui hmathlir mila plan siamna kawnga an puihna avanga lawmthu a sawi a. NITI Aayog Governing Council-a a lo dil tawh angin SSM hi kum nga dang atan an pawhseisak avangin lawmthu a sawi bawk.
Chief minister chuan kum 2047-a India GDP zaa pakhat thawh tumna Raltiang Ram hmathlir chu a sang hle tih sawiin, tum ram neih ringawt a tawk lo va, economy ruhrel thlak nena a taka ke pen a ngai a ni, a ti a. SIT hmanga ruahmanna siam a nih bakah, Minister zawng zawng tana intuaitharna buatsaih a tum mek thu a sawi a. Hmarchhak state-te chu Viksit Bharat hmathlir puitlin tur leh international ramri pahnih karcheha awm Mizoram tan bial huapa tanrual a tul thu a sawi bawk.
Inkhawm hawnnaah hian SSM Mission Director Dr. KS Rejimon chuan workshop buatsaih chhan a sawi a, Dr. Joram Aniya (Member, NITI Aayog), Chief Secretary Khilli Ram Meena leh Planning & Finance Commissioner Vanlaldina Fanai ten thu an sawi a, Public Policy Specialist Dr. Amrit Pal Kaur-i’n lawmthu sawiin a khar a ni.
A hawnna neih zawhah hian NITI Aayog Senior Specialist Dr. Shashank Shah, Consultant Sambuddha Goswami leh mi pawimawh hrang hrang ten State Vision 2047 siam dan leh GDP chhut dan thupuia hmangin session an nei zui.
Thawhtannia hawnna inkhawmah hian Chief Minister hi Home Minister K. Sapdanga bakah Minister leh MLA thahnem takin an tawiawm a. Workshop-ah hian hmarchhak state hrang hrang a SIT hruaitute leh Mizoram sorkar official pawimawhte an tel a ni.