Johannesburg-a khawchhak lama hmeichhe thah kaihhnawihah South Africa-a hmeichhe pahnih man an ni a, thi hi tun hnaia heng lai vela mi pakua thah an nih avanga nihna (gender) behchhana inthahna nena chhui zawm thil lian tak a ni mek.
Thite ruang hi kawng sira hnutchhiaha kalsan an ni mai thin a, chhui chhuah tumin nasa taka beih a ni a, police chuan mi pahnih man an ni hi ‘hlawhtlinna tanna’ niin an sawi.
Tualthihna pakua chungchang sawiin police chief nihna chelh lailawktu, Lt Gen Puleng Dimpane-i chuan an officer-ten ‘thu dik hai chhuah tumin theihtawp an chhuah’ tih a sawi.
Hmeichhe pahnihte hi tualthata puh phawt an ni a, a hmaa mipa pakhat an lo man tawh erawh puhna nei lova chhuah leh rih a ni.
Hmeichhiate an man chhan, Jabulile Ntimba-i ruang hi a zahve vel ruakin, puana tuamin Ningani khan Dawn Park-ah hmuh a ni.
Hemi hmaa ruang chhar dangte pawh an taksa ruang deuh vek leh hliam hnuhma nei an ni hlawm a; mahse, police chuan heng thihna hi a inzawm em tih leh serial killer inrawlhna a ni thei em tih engmah an la sawi thei lo.
Thawhtannia thuthar lakhawmtute a kawmnaah deputy police chief Lt Gen Tebello Mosikili-a chuan ‘mi thiam rualin heng thil hi a inzawm a ni thei em tih an en zui mek’ tih a sawi a. Ntimba-i thihna erawh ‘inlaichinna kaihhnawiha inthahna a nih hmel hle a, heng zingah hian ngaihzawng intawm pawh a ni thei’ tih a sawi.
South Africa hi nihna behchhana tharum thawhna (gender-based violence) thlen tam berna ram a ni a. Inthahna a tam em em bawk a, thuneitute chuan inthahte hi nihna angin chhinchhiah lo mah se an rama Human Rights Commission chuan kumin April leh June inkar ringawtah khan ni tin hmeichhia pasarih thah ziah niin an sawi.
Tun hnaia ruang chharte hian an ram pum luahin hmeichhiate him lohzia pawh au chhuahpui a nih nasat phah hle.