Union Petroleum Minister Hardeep Singh Puri-a chuan Middle East buaina avangin ei rawngbawlna gas tlakchham a awm thei tih thu darh mek chungchangah mamawh khawp siam chhuah a awm a, thlaphanna tur a awm lo tih a sawi.
NDTV-in an kawmnaah dan dik lo leh black-a zuar thinte an tawmim theih nan khuahkhirhna an siam mai chauh va, mipui tan manganna tur a awm lo tih a sawi.
“Hormuz-a thil thleng hian nghawng chu a nei ngei a; mahse, theihtawp chhuah zel a ni a, khirh mah se paltlang zel a ni,” a ti.
Puri-a chuan Prime Minister Narendra Modi-a’n tual chhunga siam chhuah a pun theih nana hma a lakna a fak bawk.
“Prime minister-in thutlukna a siam hi lo ngaihven mai ula. Tual chhunga siam chhuah tihpun a ni a, a hmaa ni khata tonne 34,000 siam thin kha tunah chuan tonne 55,000 – 56,000 siam chhuah ziah a ni tawh a. Khawiah mah LPG tlakchhamna a awm lo,” a ti.
India-a petrol pump nuai 1.07 zingah pawh tuialhthei nei lo an awm lo va, mipuite chu tuialhthei leh gas buaia buai lo tura chahin digital booking chu dan pangngaiin a kal reng niin a sawi.
“Nangmah i kal thei lo a nih pawhin i phone leh app hmangin i chah thei a, darkar 24 chhunga lo thleng thei reng a ni a. Khaihlak awm anga sawi hi a dik lo a ni,” a ti.
Puri-a chuan tun hnaia khuahkhirhna siam chu miin chiaia an lei chiamna tur venna tur a nih thu a sawi a. Delhi bul, Gurugram-a a thiante ngei pawhin pipe gas connection nei reng chungin nghei hlauvin an lei lawk teuh ringawt niin a sawi.
“A hmasa berin indaih lohna a awm tih a darh a. Chu chu indaih lohna tak takin a zui a, lei khawl chiamin a zui leh mai thin,” a ti a. “Ni khata LPG cylinder nuai 52 hmang thin kha indaih loh a awm thei tih a darh hnuah nuai 90-ah a kai chho va, a let thawk a ni nghal thuak a ni,” tiin thu dik lo thehdarhin mi a tichiai thei tih a sawi.
Chhungkaw pakhatin kum khata a mamawh aia bur li vela tam an lei chuan a nghawng a na tawh thin a, chumi ven nan chuan a indaihzai zawka semna kalpui niin langtlang tak zela tih a ni tih a sawi.