Aizawl: Agriculture & Farmers’ Welfare Department Minister P.C. Vanlalruata hovin Mizorama natural farming nasa zawka kalpui a nih theih nan Agriculture Department leh Mizoram Milk Producers’ Cooperative Union Limited (MULCO Ltd.) ten Nilaini khan thawhdunna thuthlung (MoU) an ziak.
A&FW Conference Hall, Tuikual-a MoU ziahna hi A&FW Secretary Ramdinliani’n a kaihruai a, department aiawhin Director Vanramthangi leh MULCO aiawhin Managing Director Ramesh Kumar ten hming an ziak a ni.
He thawhdunna hian National Mission on Natural Farming Guidelines thlawp chungin, Bio-input Resource Centre (BRC)-te tana mamawh bawng zun leh ek hnianghnar taka hmuh a, ran vulhtute sum lakluh tihpun leh loneitute tana leitha leh rannung damdawi zangkhai zawka hmuh a tum a ni.
MoU ziahnaah Minister P.C. Vanlalruata chuan kuthnathawktu leh ran vulhtute tana rahbi thar leh hmasawnna ropui tak a tlin thu sawiin, sorkar chuan kuthnathawktute dinhmun chawikan nan theihtawp a chhuah zel dawn tih a sawi a. Ran zun leh ek atanga leitha leh rannung thahna thlai damdawi (bio-inputs) siam chhuah leh hman hmang hian mipuite hriselna thlengin hma a sawn ngei dawn thu sawiin, department hrang hrang leh kuthnathawktute tanrual a pawimawh thu a sawi.
Thawhdunna thuthlung anga kalpui a nih hunah chuan MULCO hnuaia bawng vulhtute chuan an bawng zunte BRC-te hnenah hralhin sum an lakluh belh dawn a; BRC-te hian heng bawng zun leh ek atang hian organic fertilizer leh bio-pesticides siam chhuakin, Natural Farming-a in-register loneitute hnenah an hralh chhuak thin dawn a ni.