Aizawl: Kawnpui Joint Village Council buatsaihin Govt. Kawnpui Higher Secondary School, Govt. Green Hill High School (Provincialised) leh Lalfak Memorial High School (Lumpsum Special Category S2) te hlan kaina lawmna inkhawm chu Education Minister Dr. Vanlalthlana’n khuallian niin a hmanpui.
Nilainia Kawnpui Chhimveng YMA Hall-a inkhawmah Dr. Vanlalthlana chuan school-te chawisan an ni chu khawtlang tan hun chhinchhiahtlak tak a nih thu sawiin, hemi atan hian khawtlang inlungrualna leh theihna a pawimawh hle a ni, a ti.
Ad hoc atanga provincialise a nih taka avanga duhtawk lo va, exam result tha zawk nei tura tan la thar zel turin zirna in hotute a fuih a. Zirlaite pawh harsatna an tawh changa beidawng mai lova kawng dik zawh tura fuihin, nu leh pa, zirtirtu leh Pathian hnena tluk luhna chang hriaa puitling an nih a pawimawh thu a sawi bawk.
Khualzahawm, South Tuipui bialtu MLA Jeje Lalpekhlua pawhin sorkar hmalakna chu lawmawm a tih thu sawiin, inkhel thin mi a nih angin player leh coach inkar inzawmna a thain inkaihhruaina tha a awm avanga hlawhtlinna thleng thin a nih angin, zirtirtu leh zirlaite pawh inhnaih tak leh inthlunzawm tlatnaan hmasawnna a awm thei chauh a ni, a ti.
Tuirial bialtu MLA K. Laldawngliana chuan a bial chhunga school pathumte dinhmun chawisan a ni chu thil lawmawm tak a nih thu sawiin, school pathumte tan hian lawmpuina Rs 25,000 theuh leh football a hlan a ni.
Inkhawmah hian Lok Sabha MP Richard Vanlalhmangaiha chuan school pathumte hmasawnna tur leh lawmpui nan Rs 2,50,000 theuh a pe bawk.