Aizawl: Chief Minister Lalduhoma kaihhruaiin Mizoram Pro-Active Governance and Timely Implementation (Mi-PRAGATI) Meeting vawi 6-na neih a ni.
Nilainia CM Conference Hall-a thutkhawmah hian Indo – Bangladesh Border Fencing cum road, Rajiv Nagar Segment chungchang an sawi ho va. Online hmanga meeting-a tel Ministry of Home Affairs aiawhten hma an lak tawh chinte an sawifiah a. Kawng chhe tawh lutuk chu a rang lama siam that a tul thu tar lan a ni a, harsatna dawngte pawh sawi chhuah a ni.
Kaladan Multi-Modal Transit Transport Project (KMMTTP) Mizoram chhunga thawh tawh chin, tuna chhe leh tawh siamtha thuai tur leh zangnadawmna la chinfel lohte ching fel thuai turin Ministry of Road Transport & Highways aiawhte hriattir an ni a. Paletwa – Zorinpui inkar km 109.2-a thui kawngpui thawh mek chu Physical Progress 23.35% leh Financial Progress 30% a thleng tawh tih report ngaihthlak a ni bawk.
Sairang atanga Hmawngbuchhuah thlenga rel kawng sial tur chungchang leh Sairang rel station tihchangtlunna hna thawh mek sawi ho a ni a, he hmalakna bik hi chief minister kaihhruainain hun hranah la sawiho leh a ni ang.
Thutkhawmah hian PWD Minister Vanlalhlana, EF&CC Minister Lalthansanga, Agriculture Minister PC Vanlalruata leh official pawimawhte an tel a, Delhi leh hmun hrang hrang atangin agenda kaihhnawih official-ten online hmangin an zawm bawk.