Kum 10 liam ta aiin India-a hmeichhe naupang pawngsual chu a let li vel zetin a tam zawk a, National Crime Records Bureau (NCRB)-in report a tihchhuah thar berah heng thil thleng thubuai a ngaihtuah mekah tihfel loh a ngah hle bawk.
NCRB-in a chhinchhiah dan chuan India-a hmeichhe naupang pawngsual zat hi ram chhung kil tinah a kum telin a pung a. Kum 2015 khan police chuan hmeichhia kum 18 hnuai lam 10,934 pawngsual an chhinchhiah a. Kum 2024-ah chuan 43,675 daih a kai.
Hmeichhe naupang pawngsual an pun chhan hi thuneitute hnena thlen a tam tak avang leh child sexual abuse chungchanga inzirtirna a pun vang a ni pakhat a. Dan khauh zawk siamin leh vantlanga inzirtirna a tam hle chung pawhin kumtlinglo hmeichhe naupangte chunga mipat hmeichhiatne hawia dan bawhchhiatna chu chona lian tak a la ni thova ngaih a ni.
India-a hmeichhe naupang laka dan bawhchhiatna tam ber chu pawngsual a ni a, kum 2020 leh 2024 inkar khan a tuartu 1.83 an awm a, POCSO hnuaia thubuai tam ber a ni.
Mipat hmeichhiatna hmanpui ni lo, a lam hawi thova dan bawhchhiatna, sexual assault (non-penetrative) chu a dawttu niin kum nga chhungin a tuartu 96,505 an awm.
Sexual harassment tuartu 12,807, milem leh film bawlhhlawha naupang hman 2,924 leh thil dang, mipat hmeichhiatna hawi thova dan bawhchhiatna dang tuar 3,034 an awm bawk.
Kum bithliahah tleirawl kum 16 leh 18 inkarte chu kum 2020 leh 2024 inkara pawngsual tawk tam ber niin thubuai 94,503 a awm a. Kum 12 leh 16 inkar 70,442 an awm bawk a. NCRB chhinchhiahna atanga a lan dan chuan kum 12 leh 18 inkarte hi pawngsual tawk 10 zela pakhat an tling hial a ni.
Chhinchhiahnaa a lan dan chuan kumtlinglo pawngsualtu (puhte nen) tam ber hi an tuartute nena inhmelhriat sa an ni tlangpui.
Kum 2024 khan hmeichhe naupang pawngsual thubuai 97%-a a titua puh chu a tuartute mi hriat an ni a. Thian, an ngaihzawng, an chhungte, an thenawm leh an chhungkaw thian hnaite chu pawikhawihtua puh tam ber an ni a. A tuartuin a hriat ngai loh an tlem hle.
A tuartu an pun chak em em laiin thubuai chin fel hna erawh a muang hle a. Kum 2024 khan naupang pawngsual thubuai zinga chin fel zat chu 30% chauh a ni a, thubuai ngaihtuah tihkhawtlai erawh 86% zet a tling a. Thubuai a tam em avanga sawt lo niin an sawi bawk.