South Africa-a police-te chuan Johannesburg khawchhak lama Ekurhuleni-ah ruang an chhar leh a, hei hi tun hnai thla rei lote chhunga hmeichhe ruang an chhar 10-na a ni.
Ruang hi Inrinni tuk khan hmuh niin a hma ni tlaia bar-a a awmpui a thian pakhatin a hmuh a ni.
Tual chhung police commissioner chuan serial killer chetna a ni thei tih a sawi a, Ekurhuleni-a mi 10 leh Soweto-a mi dang thihna chu a inang hlawm hle tih a sawi.
Hmeichhe ruang chharte hian an rama hmeichhiate laka tharum thawhna nasa lutuk avanga mipui thinrimna a tisosang hle a, South Africa hi mihring nihna (gender) behchhana tharum thawhna thlen nasatna ber ram zinga mi a ni.
Inrinnia ruang chhar hi Johannesburg khawpui laili hmarchhak lam, Tembisa venga thlanmuala hmuh a ni.
Police chhuan a hmunah chhuituten an thutchilh nghal tih puangin tunge a nih erawh an sawi lo.
A thian chuan national broadcaster SABC hnenah a hma zana a thawmhnaw hak atangin a hre thei tih a sawi.
Gauteng Police Commissioner Tommy Mthombeni-a chuan tunah chuan a hmaa thihnate nen a inzawm em tih sawi a la har tih a sawi a. A lan danah erawh ‘a tuartute nihna inang’ a ni zel tih a sawi a, serial killer chetna pawh a ni thei a, finfiahna erawh engmah a awm rih lo tih a sawi.
South Africa hi khawvela tualthahna zat bi tamna ber pakhat niin April leh June inkarah ringawt pawh mi 5,427 thah an ni.
July thla hnuah ruang 10 chhar a ni ta a, a tam zawk hi Tembisa nena inri chiah, Kempton Park-a hmuh an ni hlawm a. Hmeichhe thalai tak tak an ni deuh vek a, an chunga tharum nasa tak thleng tih hriat tak vek an ni.