US President Donald Trump-a’n Iran-in Strait of Hormuz hawn leh theihna tura a rawtna a hnawl hnu lawkah tui kawngah hian thil puak ri a awm niin Iranian chanchinbuten an tar lang.
Iran chhim lam, strait-a Qeshm Island bulah puak a awm a, lawng kahna missile leh drone hmangin Tehran phal lohva lawng kalte kahna nia hriat a ni.
Iranian thuneitute chuan lawng beihna an la sawi lo va, an tuipuia lawng kalte chu an bei zel a, heng zingah hian kar liam taa Indian bungraw phur lawng an kah pawh a tel a, pakhat a thi.
Islamic Revolutionary Guard Corps (IRGC) chuan tui kawng hi Iranian thuneitute phalna hmu lo tan an khar a. Pathianni chawhnu khan tun thlaa US underwater drone an man pahnihna video an tichhuak bawk.
Tehran hian Iranian thuneituten strait kaltlangna tura kawng an siam chu zawh phalin kal man erawh an laksak a. US-in an lawng chawlhhmun an kharsak an hawn hma chu a vaia hawn an tum lo.
Iran-a Persian Gulf Strait Authority chuan Inrinni khan kawng atana an hawn zawh lo lawng hmangtu company-te chu an blacklist dawn tih a puang.
Washington chuan amn indo lawng hmangin kawng dangah tuialhthei phurte chu an hruai kai zel tih an sawi a. US Energy Secretary Chris Wright-a chuan Pathianni khan Fox News hnenah ‘a nih dan pangngai’ angin tuialhthei a kal a, ni khatah barrel maktaduai 13 dawnin a kaltlang niin a sawi.
September 19-a US Central Command-in a sawi dan chuan an sipaiten thla hnih chhungin Gulf-ah hian tuialhthei barrel tluklehdingawn khat chuang an kaltlangpui niin a sawi.
US sipaite hian Iran-a lawng chawlhmun an khar avangin sumdawng lawng 122-te chu an dang a, Iranian tuialhthei thawn chhuah tur an dang niin an sawi.
Tehran hian tui kawng pawimawh thunun a tumnaah strait-a lawng kal zatah US-in thu dik lo a sawi thin niin a puh a. US leh Israel tang dunin an ram an beih atang khan lawng kal a tlem phah nasa niin a sawi.
New York-a UN General Assembly-ah Iran chuan ni sarih chhunga strait hawn leh dan tur rawtna thlenin tihpuitlin tur pasarih a tuk thung.
Heng zingah hian an lawng chawlhna dansak hlih te, an sum hrensak chhuah te, Israel-in Lebanon a beihna tela kil hrang hranga inbeihna tihtawpte a tel a. Heng a thil phutte hi June thlaa US leh Israel te nen inremna an lo neih tawha mi vek kha a ni.
Tehran hian Hormuz neitu ram dang awm chhun, Oman nen pawh kawng hawn dan turah inremna an nei tawh tih a sawi bawk.
US President Donald Trump-a chuan heng rawtna hi a hnawlsak thung a. Iranian Foreign Minister Abbas Araghchi-a chuan Pathianni khan an kara palai – Pakistan, Qatar leh Oman kaltlanga chhanna a ngaihchan thu a sawi thung.