Aizawl: September 27 leh 28, 2026 chhunga Pratidin Media Network buatsaih, ‘5th Edition of The Conclave 2026’ Ashok Hotel, New Delhi-a neihah MNF President Zoramthanga hi telin, One-on-One Interview Session a nei.
India hmarchhak leh ram pum huapa thil pawimawh sawihona conclave-a ni khatnaah hian Union Parliamentary Affairs Minister Kiren Rijiju-a’n keynote address a pek hnuin Zoramthanga lehkhabu ziah, ‘From Guerrilla Fighter to Chief Minister’ tih thupui hmangin a chanchin leh politic kawng a zawh dan sawiho a ni.
Zoramthanga hian Pratidin Media Network Director Smitakshi B. Goswami nen One-on-One Interview a nei a, book signing hun a hmang.
Red Carpet Media Interview Session-ah MNF Sr. Vice President Dr. R. Lalthangliana, MLA chuan Zoramthanga leh Tawnluia te chu Peace Accord architect pawimawh tak, ram leh hnam remna thlentu an nihzia uar takin a sawi a. Kum 2028 MLA inthlanpui thlirin MNF chuan thalaite leh mipuite beisei dan mil policy leh programme thar siamin, inbuatsaihna an ngawrh hle tih a sawi a, Working President Tawnluia pawhin Press mite zawhna a chhang nghal bawk.
He Conclave pui ber buatsaihtu Pratidin Media Network hi India hmarchhak bial ngai pawimawh bik media network lian tak a ni a. Policy siamtu politician lar te, mi thiam te, social activist-te leh ram chhunga mi pawimawhte sawmin ram rorelna, politics, zirna, culture leh hmasawnna kaihhnawih thil hrang hrang an sawiho thin a ni.
CM hlui hi MNF party hruaituten an tawiawm a ni.