Aizawl: Home Minister K. Sapdanga chuan ruihhlo laka Mizoram hma lam hun humhim tura thutlukna siamin, ‘State Action Plan to Combat Drug Menace (2026-2029)’ chu Thawhtanni khan Assembly Annexe Conference hall-ah a tlangzarh a, hemi rual hian Tlangmawi khua chu ruihhlo awm lohna khua (drug-free village) atan a puang bawk.
K Sapdanga chuan kumin thla riat kalta chhung ringawtah pawh Mizoramah NDPS Act hnuaiah thubuai 635 ziah luh niin, ruihhlo leh a kaihhnawih thil Rs vbc 846 chuang hu man a nih thu leh mi 930 man an nih tawh thu a sawi.
Home minister chuan Mizoram chu golden triangle chhak lawka awm leh ramri a beh avanga ruihhlo kalkhan remchang a nih thu sawiin, chhungkua, thalaite leh khawtlang inpumkhatna tichhetu ruihhlo dona kawngah tlawmngai pawl leh sorkar tanrual a tul thu a sawi a. State Level Core Committee on Ruihhlo Do kaihhruainain police, excise, health leh NGO-te tangrualin supply reduction leh demand reduction-ah hma an la dawn a. Anti-Narcotics Task Force (ANTF) leh NCORD mechanism-te tihchak a nih bakah, ruihhlo tawlhtute laka khauh taka chetin a bawiha tang tawhte erawh lainatna lantira chhanchhuah leh siamthatna kawng hawnsak tura ruahmanna siam a nih thu a sawi.
Tlangmawi khua chuan ruihhlo laka zalenna puangin ram pum leh khaw dangte tan entawn tur ropui tak a siam tih sawiin Home Minister chuan, sorkar chuan ruihhlo do chu movement-ah chhuah a, lehkhabu tlangzarha inziakte pawh a taka chhuah a, ruihhlo laka fihlim thalaite leh chhungkua zawng zawng humhim turin sorkar, kohhran leh mipuite tangruala do chhunzawm zel a tum tih a sawi bawk.