Zokhawthar Branch YMA-in an khaw thlanmuala thlanlunga Mizo tawng ni lo thu inziak awmte chawlhkar khat chhunga Mizo tawnga ziak tha vek tura thuchhuah an siam chu Central Young Lai Association (CYLA) chuan pawi an tih thu leh sut leh tura an beisei thu an sawi a. Mizo tawng ni lo anga tar lante hi ‘Lai tawng’ a nih avangin he thil hi an ngai thutak hle tih an sawi.
CYLA thuchhuah tar lan danin, Mizoramah Zohnahthlak hnam peng hrang hrang Lusei, Lai, Mara, Hmar leh Paite te cheng hovin, tawng hrang hrang an nei theuh a. Zohnahthlak hnam peng hrang hrangte nasa zawka inpumkhat tura NGO leh pawl hrang hrangin hma an lak mek laia impumkhatna tichhe thei zawnga hmalakna leh thuchhuah a awm chu pawi an tih thu an tar lang.
India khua leh tui kherte hian mahni hnam tawnga tawng leh ziak theihna dikna chanvo an neih thu sawiin, innekchep zawnga hmalakna chu CYLA chuan tha an ti lo va, an do tlat dawn tih an tar lang bawk.
He thil hian ‘Mizo’ leh ‘Zohnahthlak’ tih huang chhunga eng hnam leh eng tawngte nge telh a nih tih zawhna a pian tir thu an sawi bawk a ni.