Zoram People’s Movement (ZPM) president, Chief Minister Lalduhoma chuan ‘Ram rorelnaa Pathian ram tun din’ tih thupui neiin eirukna tibo tura intiamna nen bul an tan thu leh sorkar hna lak dik te, eirukna leh ruihhlo dona kawnga hma lakna hrang hrang te avangin kil tinah Pathian ram a thleng mek zel tih a sawi.
Thawhlehni khan ZPM General Assembly Vawi 2-na chu Vana Pa Hall, Aizawl-ah hman a ni a, he hunah thu sawiin Lalduhoma chuan ZPM sorkarna hnuaiah advertisement kal tlang loa hna lak leh work order pek loha hna thawh a awm tawh loh thu a sawi a. An sorkar atanga ni 20-naah CBI hnenah general consent an pe nghal a, State Project Monitoring Committee dintu leh LSC lem pek chhuah tihtawp a nih bakah kuhva smuggling leh ruihhlo dona kawngah Mizoram chu India-a pakhatna an nih thu a sawi.
Minister leh MLA zingah hminghliauna nei an awm loh thu leh a tidik lo an awm a nih chuan finfiahna nen jail-a tang tura hruai a inhuam thu a sawi bawk.
President kal chhuak ta, Lalliansawta pawhin thu sawiin natna khirh tak a vei chhunga tawngtaitu leh ngaihsaktu zawng zawng hnenah lawmthu a sawi a, sorkar hmasawnna te chhuangin huaisen leh taima taka theihtawp chhuah chhunzawm zel turin mipuite leh party hruaitute a fuih a ni.
Inkhawm hi ZPM Sr. Vice President Dr. Kenneth Chawngliana’n a kaihruai a, Treasurer T. Lalhlimpuia’n hunserh hmangin, Secretary General PB Lalsawmliana’n hruaitu thar inhmelhriattirna a nei a. Autonomous District Council headquarters hrang hrang leh GAD report-te ngaihthlak a nih hnuah resolution pathum — Mizoram mipuite chunga lawmthu sawina, an party hruaitu tur tha tak tak VUC-in an ruatsak avangin lawmthu sawiin Lalduhoma kaihruaina hnuaia kum 2028-a sorkar siam leh beisei tlatna leh, Bana Kaih policy leh eirukna tihbona kawnga hmalakna lawmna te pass a ni.