Aizawl: Mizoram leh Manipur inkalpawhna tiawlsam zawk nan Sairang (Aizawl) leh Lamka (Manipur) inkar inter-state bus service tur chu Transport Minister Vanlalhlana’n Thawhlehni khan transport office tualzawl, Chaltlang atangin a vai liam.
October 1, 2026 atanga tlan tan tur he bus service-ah hian seat 21 awmna bus pahnih tlan tir a ni dawn a, he hmalakna hian Manipur buaina avanga Zohnahthlak zin veivakte harsatna tawh mek thui tak a sutkian ngei beisei a ni.
Transport Minister Vanlalhlana chuan Mizoram chu Zohnahthlakte inpui a nih thu leh hnam ropuia insiam tur chuan tlang hrang hranga chengte inlungrual a pawimawh thu a sawi a. Manipur-a chi leh chi inkara buaina thleng avanga Zohnahthlakten zin veivah kawnga harsatna an tawk thin chu pawi a tih thu sawiin, he bus service hian inunauna leh inpumkhatna tha zawk a thlen a beisei thu a sawi.
Adviser to Chief Minister (Technical) Er. H.Ginzalala pawhin hmasawnna atan inkalpawhna tha a pawimawh thu sawiin, Mizoram dan leh thupek zawm hram hram turin khualzinte a fuih bawk.
VK Tawna Travels enkawl tur he service-ah hian Sairang leh Lamka inkar km 360 bawr vela hla, darkar 12 vel thang ngai chu ni tin tlan thin a ni dawn a. Bus chuan man hi mi pakhat atan Rs 2,500 a ni ang a, ticket hi VK Tawna Bus Service Mobile Application hmangin online-in a book theih bawk a ni.