Aizawl: Home Minister K. Sapdanga chuan Nilaini khan a pisaah Mizoram Police leh Bank of Baroda-te thawhhona thuthlung, Memorandum of Understanding (MoU) kaltlangin June 16, 2026-a thi Constable J. Lalrinngheta, 1st MAP nupui, Lalenkawli hnenah Life Insurance Rs nuai 10 a hlan.
Mizorama sorkar leh bank thawhhona hnuaia life insurance pek chhuah hmasak ber a ni a, he hunah hian Police hotute leh Bank of Baroda hotute an tel.
Home Minister K. Sapdanga chuan bank service-te chu a hmang thiam leh nachang hriate tan thil tangkai tak a nih thu sawiin, vanduaina thlenga hetianga lusunte inumzuina a awm hi thil hlu tak a nih avangin Police leh Bank of Baroda hotute hmalakna chu lawmawm a tih thu a sawi.
Bank of Baroda Chief Manager LR Thara Tlau pawhin sorkar nena kum 2023 atanga an thawhho hnuah kumin June 11 khan MoU renew a nih thu leh, tunah hian Mizoram Police mi 1,000 velin Bank of Baroda-ah salary account an neih tawh thu a sawi bawk.
Mizoram Police leh Bank of Baroda thawhhona hnuaiah hian hamthatna hrang hrang a awm a. Salary Account hmanga hlawh la zawng zawng tan Life Insurance (Rs nuai 10) bakah, duty lai leh duty loh laia accident thleng laka venna Personal Accident Insurance (Rs nuai 125) te, pensioner-te tana Pensioner Personal Accident Insurance (Rs nuai 75) te leh loan laknaa Interest Rate Concession thlengin Mizoram Police te tan buatsaih a ni.