Aizawl: Public Health Engineering (PHE) department enkawltu, Minister Prof. Lalnilawma hovin a pisa-ah PHE department hmalakna kal mek leh thlen chin sawi hona neih a ni.
Nilainia meeting-ah hian Aizawl khawpui tana Tlawng lui tui pump chhuah dan, ruah sur avanga tui nu thin leh harsatna hrang hrang an tawhte sawi hovin, khawpui veng hrang hrang a tui sem dan leh tui harsatna sut kian theih dan turte ngaihtuah a ni.
Minister Prof. Lalnilawma chuan mipuiten tui thianghlim supply tha an dawn theih nan PHE dept. hi mipui tana thawk an nih angin, Minister tiamin tumah an inthlahdah a thiang lo tih a sawi a. Ruah sur avanga Tlawng lui a nu thin avanga tui sem a khaihlak chang pawhin, tui pump kawngah leh sem kawngah mipui nghawng tur harsatna a awm a nih chuan, mipuite a rang lama hrilh vat zel chu department mawhphurhna a nih thu a sawi bawk.
PHE Minister chuan hnathawhnaah mipui tana harsatna thlen tlem tur zawnga ruahmanna siam thin a tul thu sawiin, khawtlang hruaitute leh NGO-te nena thawhho a pawimawh thu a sawi a. Section tin leh veng tinah tui sem theih hun tur information mumal tak pe thin tur leh, harsatna a awm a nih pawhin a rang lama mipui hnenah thuchhuah siam vat a nih theih nan department-a thawktute a chah a ni.