Aizawl: United Pentecostal Church of North East India (UPC NEI) thalai pawl, Pentecostal Youth Department (PYD) General Conference vawi 48-na chu October 30 atanga November 1, 2026 chhung khan Thenzawl Rajput Field-ah neih chu Pathianni zan khan a tiak.

‘Thih thlengin rinawmin lo awm rawh’ (Thup 2:10) tih thupui hmanga inkhawmpui hi Zirtawpni zan khan UPC NEI General Secretary Rev. Lalmalsawma Sailo-in a hawng a, North Mizoram District PYD President Rev. B. Vanlalruata’n thianghlimna thuchah a sawi bakah Education, Environment & Kumpuan Sub-Committee ten lawmman an sem bawk.

Hemi zan vekah Environment Protection Committee buatsaih lehkhabu, ‘Hringnun Lungphum, Khuarel Mawina Kan Kutah’ tih chu General Superintendent Rev. Zohmingthanzama’n a tlangzarh a, Inrinni zing khan Thenzawl khaw chhung then fai hnatlang an neih zawh hian Field Veng UPC Biak Inah rorel a ni.

Rorel inkhawmah hian kum 2028 General PYD Conference Golden Jubilee chu Aizawl East District-a neih tura rel niin, thalaite ta tana Bible chhiar uar beihpui thlak te, Asia Region-a missionary tirh chhuah leh zirna leh eizawnna tha zawk neih theih nan ram pawna intirh chhuah tam zawk tura hmalak te pawh rel a ni.

Pathianni chawhma inkhawmah General Superintendent Rev. Zohmingthanzama’n thupui hmangin thuchah a sawi a, zanah General PYD President Rev. C. Lalmalsawma’n thuchah a sawi a, chawhnuah Praise & Worship hun hlimawm hman a ni bawk.

PYD, NEI-ah hian North East India hnuaia district 12 – Aizawl East, Barak, Central, Chandel, Chhimtuipui, Churachandpur, Imphal, Lawngtlai West, Lunglei, North Mizoram, South East Nagaland leh Tuichang atangin member 6,500 chuang khawmpui hmang tur hian an kal a ni.

Report bu-a tar lan a nih danin, tunah hian General PYD hnuaiah hian District 12 leh Missions Field 9 awmin, Section 145 leh Local 668 a awm a, PYD member 30,571 (mipa 18,384, hmeichhia 12,187) an awm mek a ni.

CM-in inkhawmpui hmanpui

UPC NEI General PYD Inkhawmpui hi Pathianni chawhma inkhawmah Chief Minister Lalduhoma’n telpuiin palaite hnenah chibai bukna leh fuihna thuchah a sawi.

Chief minister chuan inkhawmpui lian tak dawng tura Thenzawl khawtlang mipuite leh pawl hrang hrangte tangruala an thawhho thinnaah lawmthu a sawi a. Thenzawl khua chu ‘Muanna Khawpui’ ni tura ruahman mek a nih thu leh hmalakna lian tham hrang hrangte kalpui mek a nih angin, Mizorama khawpui mawi ber leh pawimawh berte zinga mi ni tura buatsaih mek a nih thu a sawi bawk.

Hetianga inbuatsaihna leh ruahmanna awm zawng zawngte hi Pathian tel lo chuan a thlawn vek dawn tih sawiin, inkhawmpui hmasawnna leh khawtlang hmasawnna turte chu Pathian ropuina puanchhuahna hmanrua a nih ngei theih nan duhsakna a hlan a ni.

UPC NEI General PYD Inkhawmpui vawi 48-na hi October 30, Zirtawp zan atanga tan a ni a, ‘Thih thlengin rinawmin lo awm rawh’ tih thupui hman a ni a. Pathianni zan hian a tiak a ni.