Kolasib district chhunga ruihhlo dona kalpui meka thawk tha tak, 1st IR Battalion-a mi Hav. PC Lalremmawia hnenah Zirtawpni khan a thawhrimna leh inpekna hriatpuinain 1st IR Bn Headquarters, Mualvum-ah chawimawina hlan a ni.
Pawisa fai leh chawimawina thuziak hi 1st IR Bn Commandant M.S Dawngkima, MPS chuan a hlan a, Hav. PC Lalremmawia hian ruihhlo do kawngah theih tawp chhuahin tum tam tak zu leh ruihhlo thahnem tak man chhuah a nih theih nan hna lo thawk a ni.
Chawimawina hlanna hunah Commandant M.S Dawngkima chuan Kolasib district chu ramri fel lo laia awm a nih avangin dan leh thupek kengkawhtuten tha thlah lova ruihhlo an do zel a tul thu a sawi a. Hun kal tawhah pawh 1st IR Battalion-a Police thawktute zingah ruihhlo do kawnga an chet that avangin mi thahnem tak hnenah cash reward hi lo hlan a nih tawh thu a sawi.