Aizawl: Larsap General (Dr) Vijay Kumar Singh (Retd) chuan Administrative Training Institute (ATI), Aizawla foundation course training mek Mizoram Secretariat Service (MSS) Junior Grade Officer-te chu Durbar Hall, Lok Bhavan, Aizawlah Thawhtanni khan a kawm a, public service-a thutlukna huaisen leh rintlak lak a pawimawh zia a sawipui.
Larsap chuan administrative service hnuaia eng hnaah pawh training tha neih hmasak a pawimawh thu sawiin, sorkarin training tha a buatsaihsak chu remchanga hmanga inzir zel tura fuihin, zirnain tawp chin a neih loh thu leh inzirna bansan chu tlak hniamna a nih thu a sawi.
MSS officer-te chu an khaw hawi tizau a intuaihriam zel tura chahin, an thawhna apiangah harsatna thlentu aia a sukiangtu leh mipui tana danglamna thlentu nih tum tlat tura fuihin, an dinhmun ai maha an hna thawh avanga mite hriat hlawh nih tum zawk tura chah chungin dan zawm thlap chunga Mizoram leh a chhunga cheng mipui tana thutlukna huai tak siam ngam turin a chah bawk.
He huna officer-te hi ATI Director Rita Lalnunmawii Pachuau leh a thawhpuiten an tawiawm a ni.