Artificial Intelligence (AI) industry-a mi pawimawh leh langsar ber pakhat chu Chinese enthlatu (spy) nia hriat nen inkungkaihna nei nia sawi a ni a, chhui mek a ni.
US intelligence thuneitute chuan Chinese sumdawng, Beijing tana enthlak hna thawk nia an sawi, Alice Huang-i chu Nvidia CEO leh dintu pakhat zawk, Jensen Huang-a te chu an inkawp niin an ring tih New York Times-in a tar lang.
Pathianni khan Huang-a hian a nupui ‘a rinawm lohsan’ ngei thu leh a kawppui leh a fate rilru a tihnatnaah ngaihdam a dil.
Khawvela company hlu ber pakhat, US tech giant Nvidia chuan chanchinbua thuchhuah chu a hrana chhui hna an kalpui nghal tih a puang a. US himna a derthawn phah loh an rin thu leh Huang-a’n an company chu a la enkawl zui tur thu an sawi bawk.
US thuneitute chuan Alice-i hi China-a enthlatu pawl lawk berte chhawr niin an ring tih New York Times chuan a tar lang a, tuna a awmna pawh hriat a ni chiah lo.
March leh November, 2023 inkar khan Singapore-a data centre firm, Megaspeed-ah executive pawimawh tak a ni thin a. He firm hi Nvidia chip-te China-a a luh theih nana hmalatu nia rin a ni.
Megaspeed hi Singapore sorkar pawhin Nvidia-in a siam chip tha chite a thawh chhuah kawngah US-in a hrek loh nana an chhui lai mek a ni bawk.
Company hian thla hmasa khan New York Times hnenah an hruaitu tanglaiten an puhnate chu an ngai thutak hle a, an company chhung chu pawn lam mi dan hre mite chhui turin an ti tih an lo sawi tawh.
Thlithlainaah Alice-i leh American khua leh tui an inbia tih hriat chhuah niin hei hi Jensen Huang-a a ni tih pawh hriat a ni tawh.
Huang Le tia hriat bawk, Alice-i hian eng thu rukte nge Beijing hnenah a thlen tawh hriat a ni lo va. Chanchinbuin a chungchang an chhuah pawh engmah sawi a la nei lo.
China chuan mi ram enthlaa puhna hi a pha a. Foreign ministry thupuangtu, Guo Jiakun chuan Thawhtannia a tih dan thina thuthar lakhawmtute a kawmnaah, “He thil hi a hma pawhin kan lo sawi tawh a, Chinese enthlatute nia sawi hi engmah tanchhan awm lo, rinthu leh China hmel tihbalh tumna a ni,” a ti.
New York Times hian October thla tawp khan President Donald Trump-a hnenah nikum khan Alice-i hi China tana enthlak hna thawk a ni tih hrilh a lo ni tawh tih a tar lang bawk.
Pathiannia Huang-a chungchanga an zawhnaah Trump-a hian enthlakna kaihhnawiha a tel a rin loh thu a sawi a, mi zahawm tak nia a hriat thu a sawi.
Hetih lai hian US Secretary of State Marco Rubio-a chuan Huang-a chungchang hi a sawi duh lo va. Nikum favang lai secretary of state hian Trump-a sorkarin Huang-a leh Chinese sumdawng inkungkaihna an sawina erawh a hriatpui niin New York Times chuan a tar lang.
Nvidia hi AI-a US leh China intlansiaknaa pawimawh tak niin , hei hi mi hausa tawntawte inkara inkungkaihna awm pawhin ngaihven a hlawh phah a ni.