Aizawl: Mizoram police chuan ni hnih chhungin Rs nuai 682 man hu ruihhlo leh ram dang cigarette an man.
Zokhawthar Police Station team chuan Zokhawthar leh Melbuk inkar kawngah patrolling an neih laiin Champhai pana tlan Maruti Suzuki Eeco Van atangin methamphetamine kg 3.275 (Rs nuai 262 man) leh heroin gram 145 (Rs nuai 29 man) an man a, a khalhtu Lalthanvula leh passenger Sangkimi te chu ND&PS Act hnuaiah thubuai ziah luhsak an ni.
Saitual Police Special Team pawhin Keifang Kualmawia checking an neihnaah Brezza car atangin Rs nuai 146.6 man hu heroin gram 733 manin Assam mi Johirul Islam leh Guljar Hussein-te an man tel bawk.
Aizawl DEF team chuan Seling Naka check gate-ah lirthei pahnih, Tata Sumo leh Mahindra Pickup atangin foreign cigarette master case 93, a hlutna Rs nuai 247 vel tura chhut an man bawk a, a kaihhnawihah hian Singrothuami leh Lalchamliana te an man zui bawk.