Ruihhlo ngaite chhanchhuah leh enkawl zui kawngah sorkar chu tlawmngai pawl leh kohhrante nen thawk hovin a inhawng reng a ni tih Chief Minister Lalduhoma chuan a sawi.
Thawhtanni khan Phunchawng-a Operation Kingdom Ministry (OKM) Home-a Students’ & Parents Day neih a hmanpuinaah chief minister chuan thu sawiin Mizorama inenkawlna home leh centre-te chu rinna behchhana din leh enkawl an nih avangin chhuanawm a tih thu a sawi.
Sorkarin ruihhlo supply tihtawpna turin Operation Trident leh Operation Jericho-te kaltlangin excise department leh sorkar laipui, state thenawm Assam leh Manipur-te nen tangrualin hma an lak mek thu a sawi a. Excise department bawk hian kum thum chhung (2024–2026) khan ruihhlo kg 3,820 leh gram 578 zet an man tawh thu a sawi bawk.
Ruihhlo bawih ata chhanchhuahte hi Hulhhliap Short Stay Centre-ah enkawl zui an nih bakah skill development training chi li — assistant electrician, plumbing, basic food processing leh aluminium fabrication-ah te inzirtirna pek an nih thu a sawi a. Course tihlawhtling mi 20-te hnenah Chief Minister Special Package atangin eizawnna bul tanna tur Rs 50,000 theuh pek an nih tawh thu sawiin, OKM-a awm mek zirlai 367-te pawh sim duh leh rim tak a hnathawk duhten sorkar thlawpna an dawng reng dawn a ni tiin a sawi.
He inkhawmah hian Aizawl West I bialtu MLA TBC Lalvenchhunga pawhin thu sawiin thalai tam tak home-a an awm chu veiawm a tih thu a sawi a, zirlaite chu beidawng lova ni khat tete-a hma sawn tum tura chahin a fuih a.
Central YMA Treasurer Er. H. Duhkima pawhin zirlaite chu hmangaihna leh khuahkhirhna hnuaia awm an nih inhre tura chahin theihtawpa a hneh tum turin a chah bawk.
Tun dinhmunah Operation Kingdom Ministry Home-ah hian zirlai (ngawlvei) 367 awmin thawktu 44 an awm mek a ni.