Manuna Hardray, tia kan hriat thin Lalnunkenga Chuaungo chuan November ni 13, Zirtawpni hian Chaltlang South Presbyterian Biak Inah Dr Philo Lalrinsangi, Zotlang nupuiah a nei dawn a. He hun hmanpui tur hian anmahni duhsaktu zawng zawng a sawm thu Manuna chuan Thalai Times a hrilh.
“Sawmna inpek a har a, sawmna hranpa kan siam lo hrim hrim. Kan inneih tur hria zawng zawngte lokal vek turin kan sawm tak meuh a ni. Kei, engmah ni lo hian duhsaktu tam tak, ka phu lovin ka nei tih ka hria a, khawvela ka hlimni ber min hmuhpui tur hian ka sawm che u a ni,” tiin Manuna chuan a sawi.
Manuna leh Dr Philo inneih hi dar 1-ah tan tur a ni a, Biak Ina inkutsuihna neih a nih hnu hian Chaltlang South Presbyterian Kohran Hall-ah joint reception neih tur a ni a. Siampuii Ralte leh BZI Tochhawng an zai dun dawn a, Vanlalsailova a zai dawn bawk. Host tur hi DJ Lalvenhimi a ni ang. An inneih cake tur hi Special takin LS Bakery chuan a thlawnin an siam sak bawk dawn a ni.
“Beidawn tawh hnulamah nupui tur tha tak Pathianin min pe a, thinlung takin ka lawm a ni,” Manuna chuan a ti a, “March thla atangin kan inbia a, a rei lo. Rei lote chhungin hmangaihna par a lo vul ta a ni,” a ti.