Mizo hmeichhe zaithiam zinga stage performer tha ber pawl, Jaui chuan hun eng emaw chen single a tihchhuah loh hnuah, a rawn tichhuak ve leh ta.
‘I Hlutna’ hitmaker hian single thar — Hlima Lawma (Ka Thlah Phallo Che) tih chu Zirtawpni liamta khan a YouTube channel — Jaui — kaltlangin a tichhuak a. A single thar hi Hmachhuana Khiangte phuah a ni.
Kum thum kaltaa Champhai DFO tana ‘Zoram Rohlu’ tih hla a sak kha, a hla tihchhuah hnuhnung ber a ni. Heti hian, kum thum hnuah single thar a rawn sual chhuak ve leh ta tihna a ni.
Jaui hian a single thar chungchang hi, “Kan buaipuina a rei tawh a. Mahse, zaia zin ve nen, midang ka thawhpuite pawh musician active lai an ni a. Hman hun a inrual lo nen, a ruala hun awl neih a lo har a. Hun remchang kan neihah kalkhawmin kan ti chho bek bek a, kan khawr pum, tunah chuan kan tichhuak fel ta,” tiin Thalai Times a hrilh.
A hla chungchang sawiin Jaui chuan, “He hla hi a hlut zual ve em em nachhan chu, thiante an tel ve vang pawh a ni ang. A hla hian a sawi tum ber chu ngaihtuah buai vak vak lo va, hmangaih nih inhriat a, pawm a, hlimpui mai tura tihna a ni. ‘Hmangaihna nen chuan engkim kan ta alawm’ tih lai hian min hneh zual bawk a. A ngaithlatute pawhin a hla hming ang hian an lo hlim a, an lo lawmpui ngei ka beisei!” a ti bawk.
Tun tuma a music video bik hian danglam bik riau a nei. A chhan chu, Jaui hian music video hrim hrim hi hautak lutuk hian a shoot ngai lo. Tun tum erawh, suitcase hnih a keng mauh mai a. Ama tawkah, amah puitute zarah a mawi viaua a inhriat thu a sawi.
Hla dang pahnih a buaipui laiin, tuna a single thar hi tihchhuah leh buaipui hmasakah a thlang leh thut a. Chuvangin, tuna a single music video a tihchhuah zawhah, hla thar a tihchhuah leh thuai lo beisei teh ang.
Hlima Lawma (Ka Thlah Phallo Che) — tih hlaah hian Mizo musician tha tak takin an pui a. Audio production hi Hmachhuana Khiangte leh Mikeji te kutchhuak a ni a. Mizo guitarist hriat lar, tuna Shai Hills guitarist ni mek Jonah Ralte hian guitar a perhsak a. Recording hi Home Music buaipui a ni a, video erawh hi chu Green Rocket TV siam a ni thung.
Hei bakah hian, a thianpa, Delhi-a stylist hna thawk mek hian a hak tur a buaipui vek a. A kuttin hi Moos_tee chei mawi vek a ni a. Makeup hi Makeup by Ruatfela vek a ni bawk. Tlereuh lam hi Five Kids Golden Dew ten an pui tih sawiin Jaui chuan, “Thawhpui an nuam vel vekin, an professional em em,” a ti.
A zai hlutsak em em tute hmai zahawm khawpin hla thar a tichhuak thei lo chu a inthlahrun thu sawiin, “Min rawn nawr tawk an awm bawk a. Ka lawm. ‘Video chhuah hma chu nupui ka nei lo ang’ ti te pawhin an nei thei tawh dawn e. Hahah…” tiin tute emaw ni chu a rawn kap hlak!