Aizawl: Amazing Namaste Foundation buatsaih’’Namaste Awards 2026’-ah Serchhip district Deputy Commissioner Paul L. Khuma chu ‘Public Service & Governance’ category-ah Northeast India State pariat atanga chawimawina dawng hmasa ber ni turin thlan a ni a, he chawimawina hi November 14, 2026 hian National Stock Exchange Atrium, Mumbai-ah hlan a ni ang.
He Award hi India hmarchhak ram hmasawnna leh sustainable development a awm theih nana kalphung thar leh hna thawh dan dangdai (innovative) hmanga thawh hlawk tak te chawimawina tura duan a ni a, hmarchhak state pariat atanga nomination tam tak lut zingah DG of BSF & CRPF hlui Sujoy Lal Thaosen, IPS (Retd) kaihhruai Independent Panel chuan ngun taka an endik hnuah Paul L. Khuma hi an thlang chhuak a ni.
Category 5-a then ‘Namaste Award’ semna hmun Mumbai-a neih turah hian Maharashtra Governor Jishnu Dev Varma chu khuallian niin chawimawina hi a hlan dawn a ni.