Nilaini zing dar 6:45 vel khan Train No. 13125 Kolkata – Sairang Express chu Guwahati atanga kilometre 44 vela hla Digaru Railway Station, Assam-ah a rel kawng zawh sual avangin a chesual a, he chetsualnaah hian rela chuang mi 900-te zingah thi leh hliam tuar an awm lo.
N. F. Railway Chief Public Relations Officer Kapinjal Kishore Sharma thuchhuah a tar lan danin, rel hi rel dang kawng kian tura ruahman a nih laiin Loco Pilot-in speed a thunun zawh tak loh avangin rel kawng a zawh sual a, a khawl bakah pindan (coach) panga chuan rel kawng a dai pelh ta a ni.
Rel chesualah hian NF Railway general manage leh official senior-ten a hmun pan nghalin an ngaihven nghal a. Tangkhangte chhanchhuak tur leh Sairang panpui tur hian special train tirh nghal niin, dar 11:30 vel khan mi 900-te chu ei tur leh tui in turte pein Sairang an panpui a ni.
Rel chesual avang hian tualchhung train pahnih — Alipurduar-Mariani Intercity Express leh Guwahati-Haibargaon-Guwahati tlan tur te thulh a ni a, train dang te erawh dan pangngaiin an tlan chhunzawm leh nghal a ni.