Aizawl: Sports & Youth Services Minister Lalnghinglova Hmar chuan Nilaini chawhnu dar 2 khan MINECO-a a pisa-ah New Delhi-a neih zawh tak, 47th World Arm Wrestling & 28th PARA Arm Wrestling Championship 2026-a medal la Mizo infiammi mi pangate lawmpuina hun a hmanpui a, Mizo infiammiten ram leh hnam an tihmingtha chu fakawm a tih thu sawiin lawmthu a hrilh.
October 28 atanga November 7, 2026 chhunga New Delhi-a inelna neihah hian khawvel ram 65 atangin infiammi 2,000 vel an tel a; India aiawh mi 260 zingah Mizo infiammi 14 telin, an zinga mi panga chuan gold medal pali, silver medal pakhat leh bronze medal pakhat an hawn a ni.
Sports minister chuan Arm Wrestling chu National Games leh Paralympic Games thlenga telh tura hma lak mek a nih thu sawiin, hemi a puitlin chuan Mizoram tan medal beisei ngamna discipline a ni dawn tiin Mizo infiammite chu tan la lehzual tura fuihin, Sports Incentive Cash Award sem hunah medal latute hnenah hian incentive lawmman hlan an nih tur thu a sawi bawk.
He hunah hian Mizoram Arm Wrestling Association (MAWA) President Joseph K. Lalmuanpuia chuan inelna report tawi pein, Sports Minister-in inelna hmachhawn tura ruahmanna leh sum mamawh a dapsak avangin lawmthu a sawi a; MSSC Senior Sports Promotion Officer Albert Lalnunpuia leh MAWA hruaituten minister hi an tawiawm a ni.