Kumina neih 57th International Film Festival of India (IFFI)-ah a vawi khat nan Animation segment thar telh a ni a, ram panga — Japan, France, China, Singapore leh USA atanga thlan chhuah animated feature film tha tak takte chhuah niin, film ngainatute leh he lama tuite tan kawng zau tak a hawn sak beisei a ni.
He segment thar hnuaiah hian Japanese filmmaker Masanao Kuwajiri direct ‘Cherry and Virgin’ chhuah a ni a, live action footage leh animation chawhpawlha siam he film hian artist zakzum tak Ryo leh Ami te inngaihzawnna leh mi mal harsatna an hneh chhoh dan a tar lang.
French animated film ‘Jim Queen’, Gobelin school chhuak Nicolas Athané leh Marco Nguyen te direct chuan Paris gay community zinga fitness influencer lar tak Jim-a’n heterosis virus leng vanga harsatna a tawh leh damna a zawn dan chanchin a pho lang bawk.
Chumi rual chuan Beijing Film Academy chhuak Xu Zao debut film, Chinese animated film ‘Light Pillar’ pawh chhuah niin, khawvel siamchawp (virtual)-a hmeichhe ngaizawngtu Zha-a’n a suangtuahna ram atanga khawvel tak taka a lo kir leh dan a tar lang a ni.
Singapore atangin Sun Xun direct, Chinese tawnga siam ‘Magic Atlas’ pawh a tel a, dawithiam pakhat leh fahrah naupang Xiao Zhi te tan ina an tan dun dan leh dawithiam lehkhabu inhlanchhawn dan chanchin a ni.
Hei bakah hian khawvel hriat hlawh film ‘The Incredibles’ leh ‘Ratatouille’ siamtu Brad Bird direct, sap tawnga siam ‘Ray Gunn’ pawh chhuah niin, khawvel thar Metropia-a mihring leh alien te chen ho dan a tar lang a; he segment thar hmang hian IFFI chhimtute tan animation film khawvel zau zawk hmelhriatna hun tha tak siamsak a ni.