Larsapin AR sipai thawk tha 44-te tangkapui hlan

Aizawl: Inspector General Assam Rifles (East) buatsaihin Durbar Hall, Lok Bhavan, Aizawlah Assam Rifles Investiture Ceremony 2026 neih a ni a, he hunah hian Larsap General (Dr) Vijay Kumar Singh-a chuan AR sipai zinga hna thawk tha zual thlan chhuah mi 44-te hnenah chawimawina tangkapui, Governor’s Gold Medal 26 leh Silver Medal 18 a hlan.

He ni puala thu a sawiah larsap General (Dr) Vijay Kumar Singh chuan chawimawina dawngtute lawmpuiin, an lawmman dawn chu ram tana an inpekna leh tha thawh ngaihhlutna a nih thu a sawi a. Investiture ceremony hi programme satliah mai ni lovin sipaite phurna nasa zawk pek nana buatsaih a nih thu sawiin, medal dawngtute chuan hma lam huna chona awm turte pawh tun aia tha zawka an hmachhawn theih ngei a beisei tih a sawi bawk.

Larsap chuan Assam Rifles-te chu tunhma atang tawhin India hmarchhakin hun harsa a paltlang lai pawha ram rawngbawl kawnga hmingtha leh mipuite nena thawkho tha tak an nih thu a sawi a. Indo-Myanmar ramri ven leh ruihhlo tawlh beih let kawnga an hmalakna chu fakawm tiin, ram himna atan engtik lai pawha inring renga mit leh beng chhi tur leh an kalna apianga India hnam puanzar chawisangtu nih tum theuh turin sipaite a chah.

Nilainia chawimawina hlanna inkhawmah hian IGAR (East) DIG Brig. V. Vidya Shankar, 23-Sector Assam Rifles DIG Brig. Puspendar Sorayan, CRPF officer-te leh Assam Rifles sipai eng emaw zat an tel a ni.

Leave a Reply

error: Content is protected !!