- Zirsangkima
Vawiin chhùn khan ka \hiannu … mai ni lo, engtikah mah ka nupui a ni thei ngai loang tih hre reng chunga ka hmangaih tlat, ka hmangaih ber Sàwmtei chu kan vui liam ta! |ah àwm ka nih tehrêng nèn, ka mittui hi far khat pawh a far eih lo. A chhan chu, huaisenna, tawrhchhelna leh beiseina nei tùra min zirtírtu a nih \hin vàng a ni.
Sikul thara páwl 11 kan luh \an ní kha ka la hre reng—ka awmna tùr Section haia Section A-a ka lo \hut ve veng veng ní kha. Kan Sir-in hming a lam a—ka tel ve lo! Zak chung chungin ka va pan a; ka hming a chuan ve loh thu ka va sawi a nih kha.
Ka hnungah chuan, ‘Sir, kei pawh …’ tia keimah ang thoa hming chuang ve lo tleirâwl a lo ding ve reng chu ka’n en zawk a—awi ka nû!
Kan Sir chuan chu tleirâwl duhawm tàwpkhâwk nèn chuan office lama va sawi tùrin min tír a. Khami \uma Class XI, Section A room a\anga kan inzui chhuah a\ang khan nizàn thleng khan Sàwmtei nèn hian kan inzui chho ta zêl a ni—kum hnih leh ni 102 chhúng a ni ta! Nizàn zanlai pelh det khan, ani chu zui theih a ni ta lo—min kalsan ta a ni!
Class XII exam dáwnin a dam lo a; mahse, a exam tho a. Kan class-a pakhatna ni char char \hin kha IIIrd Division-ah a pass hrãm a; a làwm êm êm mai a. A chhúngten \ûl an ti lo chung a pass lawm a ngèn lui tlat a. Kan làwm a; mahse, kan lãwm rei lo ngei mai! Chumi tlai chu a ni, a hmaa damdawi ina a in-test-na result chhuah ní chu—cancer a vei a ni tih a chhúngte leh kei chauhina kan hriat tlai chu! Amah an hrilh duh lo.
A cancer chu a chak chî a nih mai bâkah … tlang taka sawi chuan, a dam rei tawh lo ang! A chhúngten amah an hrilh tlai chuan a thinrim ngei mai—a natna a la ná a ni lo; an lo zêp rù chu a la na a ni zâwk! Min rawn phone a. An ina léng tùrin min rawn ngèn nghâl. Ka phei a. A pindanah a nu’n min hruai lût a. Namén loa nasain a \ap ta mai. ‘Min hmangaih lo em ni? Engati nge ka natna hi i zêp? Min hmangaih tawh suh!’ tiin min hau a. Hnem ngaihna leh sawi tùr ka hre lo hle mai.
A duh lo chung phaiah an inenkawl a. Ka ngai \hin mang e. Cancer vei, dam lo ka ngaizáwng a; amah chauh ni lo a natna pawh ka hmangaih tel tlat si. An rawn hàwin a duh lo chung ka buaipui zui zêl a. Ani chu a na lo … ti ila a taksa chu na mah se, a rilru a dam thung a; amah buaipuitute hian a intidam lutuk hi kan dam lohpui a ni zâwk mah àwm e.
Thla hmasa pawh khan Sâwmtei chuan college a la rawn kal lui hrãm hrãm a—sam lem vuahin. A doctor-in a hau a; ani chuan, ‘Eng nge a pawi vakna? Hun ka neih tlèm tawh êm hi … Nang leh phaia doctor-te paw’n tih ngaih min hre tawh lo a. Ka hun neih chhun hi hlim tak leh ãm taka \hiante bula hman ral ka duh alãwm. Tunge thi lo tùra piang awm chuang? Kal hmá deuh tùr leh tlai deuh tùr chu an awm a ni maithei; mahse, kan dam chhúng hi chuan hlim hi asin kan mamawh ber,’ tiin a chháng siah siah mai si.
Lungngai lo tùra fuih a ngai ngãi lo a; keimah zâwk hi ‘a kal huna’ lungngai lo tùrin min fuih \hin. Zãm lo tùra ka fuih ai chuan, lungawi taka ‘a kal hma tala’ amah hmangaih tlat tùrin min ngên \hin—chutiang rilru chu ami ngen ngai loa ka put nasat tehrêng nèn. Chelh tlat ka duh a, vawn reng ka thlahlel a, kuah reng ka châk a, thlah ka phal ngai lo a ni si a. Ani paw’n min thlah a thlahlel lo khawp mai, min hmangaih a la kham bîk lo; mahse, a natna chuan a remtihpui reng thei si lo!
ICU-a awm tùra tih a nih paw’n a duh tlat lo. A pindanah chuan a hun tàwp hman a duh a. A thâwk \êk \êk theih chhúng zawng, a mar a chah hnû, a kut lum thar thar \hin a vawh ral raih thlengin, nizàn zanlai pelh hret thleng khan mi huaisen Sàwmtei chu ka vuan reng a ni …
Thlàn a\anga ina kan hãw chu, a pindana a phone, lo la in charge reng chu chu ka phawi a. Keimah chiahin a pattern unlock dàn ka hre si a; ka en ta a. Facebook-ah chuan a thu post tum, a la type zawh loh ni ngei tùr hi ka hmu a:
‘|hiante u, engati nge keimah avàng hian in lo lungngaih a? Engati nge ka kuang chung khera \ah in tum? In \ap dâwn a nih rau rau chuan ka dam lai hian ka kiangah hian rawn \ap mai ta che u. Hmangaihna leh lainatna te, \hatna leh ngilneihnate hi ka kuang chungah ni lo, ka dam laia hmuh hi nuam ka tih zâwk ka ring…’
A phone hmai-ah chuan ka mittui chu a far kauh kauh a…