Aizawl: Mizoram sorkar hnuaia Food, Civil Supplies & Consumer Affairs department chuan Mizoram chhungah petrol leh diesel laka inrenchemna leh khuahkhirhna hman chhunzawm turin thupek a tichhuak.
Mizoram IOCL Transporter Forum leh IOCL inkarah tuialhthei/POL phurh man chungchangah inrem theih lohna a awm avangin April 1, 2022 a\ang khan Mizoramah tuialhthei/POL lut a khaihlak a. Hei hian nghawng lian tak neiin mipuiin tuialhtheiah harsatna an tawk mek a. Hei hi hriain sorkar chuan rualkhai zawka mipuiten an inchan theih nan petrol leh diesel control order a tichhuak leh a ni.
Sorkar leh mipuiten harsatna lianzawk tawk loa petrol leh diesel mamawhtuten rualkhai zawka an chan theih nan POL inrenchemna leh khuahkhirhna chu hman chhunzawm zel rih tur thupek a tihchhuahah vawi khatah lirthei ke hnih nei (two wheeler)-te chuan litre nga an la thei dawn a, LMV chinin litre 10, MMV-in litre 20 leh HMV-ten litre 40 zel an la thei dawn a ni.
FCS&CA dept chuan petrol leh diesel chawk luh kawngah harsatna nasa zawk thleng thei a nih avangin, mi tinte inrencham tur leh mahni mamawh tawka liam chheprelh lo turin an ngen a. Mipuite leh thawktute tan a awlsam zawk nan POL mamawhtuten office dawr kher loa online-a POL an dil theih turin application (fcsca.ssdd.in) an siam bawk.